Otmar Oduber ta dicidi den weekend si e ta participa na proximo eleccion Parlamentario

ORANJESTAD – “Mi participacion na e proximo eleccion lo keda dicidi despues di consulta esnan mas serca dimi”, ex minister Otmar Oduber a bisa Noticiacla dialuna riba su situacion politico awor cu gobierno a cay. Esaki ta nifica cu tin eleccion mas prome cu planea, esta 6 di December proximo. Riba e pregunta ki tempo despues di e consulta e lo tuma y anuncia su decision si e ta participa na e proximo eleccion, e la bisa cu esaki ta tuma lugar despues di e fin di siman aki mes. Pues comienso di otro siman ta conoci si Oduber ta participa na e proximo eleccion. 

REACCION PA CU E CAIDA DI GOBIERNO

Segun Oduber, e caida di Gobierno no solamente ta un berguenza pa esnan cu a monta e show aki pero mas ainda ta un insulto pa e pueblo votador y comunidad di Aruba engeneral. Egoismo politico y personal na orde di dia.

CASO PENDIENTE

E pregunta cardinal tambe, tabata con e caso Flamingo cu ta cuminsa na November por afecta su participacion y si esaki ta un punto. Esaki pasobra cu un caso na November y un sentencia programa pa December, ora cu tin eleccion, ta pone hopi pensa cu esaki por tin su efecto riba e chensnan pa Oduber den e eleccion, bon of malo.  Oduber a reacciona cu e caso  lo tuma lugar dia 18 di november y cu “ tur hende sa cu henter e caso aki ta un wega y conspiracion cu lo worde destapa. E caso aki ta bai bira e berguenza mas grandi den reino pa ministerio publico” e ex mandatario a finalisa bisando.