E siman aki parlamentario independiente Gerlien Croes ta lansa su propio partido

ORANJESTAD – Parlamentario independiente Gerlien Croes ta lansa su propio partido e siman aki. Esey e la informa recientemente y a bolbe confirma esaki dialuna mainta. Tabata e siman cu a pasa cu riba su pagina di Facebook e la publica algo cu a laga hopi hende curioso. Tres palabra ‘TUR’, cu e color teal, cu a pone hende specula caba si esey ta e nomber di su partido cu e lo kier a lansa. Despues cu e gabinete Wever-Croes II a cay dialuna mainta, diripiente e tempo a bira hopi mas preta pa bin afo, y e siman aki e parlamentario lo divulga e nomber, formato y tur otro asunto relaciona cu e lansamento aki.