Na Corsou un homber a keda likida despues di a dal dama wanta

WILLEMSTAD  – Ayera den oranan di anochi alrededor di 9 or, sentral di polis a haña informashon di un posibel kaso di asesinato ku a tuma lugá den  Cocolodeweg Montaña na altura di toko Xing Dai.

Polis i ambulans ku a yega na e sitio, a topa un hòmber na suela ku perforashon di bala, mei mei di dos vehíkulo ku tabata stashoná na e toko. E personal di ambulans a hasi lo máksimo pa reanimá e viktima, pero esaki no a duna resultado.

Durante un kombersashon ku Extra a hiba ku bosero di polis Mauritz Rosalina na e sitio, el a konfirmá ku enbèrdat ta trata aki di un kaso di asesinato.

Segun Rosalina testigunan a duna di konosé ku e viktima tabata den diskushon ku algun persona i direpente nan a tende tiru zona. Despues di e tiru, e viktima a kai abou i e sospechosonan a fuga fo’i dje sitio.

Rosalina a bisa ku na e  momento ei tabata prematuro pa duna identidat di e viktima.

Fo’i testigunan ku tabata na e sitio, Extra a haña komprond’é ku e viktima ta un hòmber hamaikino.

E tabata den diskushon ku un dama i dado momento el a dal e dama un wanta.

Un di e dos hòmbernan ku tabata sintá den un vehíkulo ku aparentemente e dama a presentá kuné, a saka un arma di kandela i a tira dirigí den direkshon di e viktima, ku mes ora a pèrdè su bida na e sitio mes dor di e impaktonan di bala.

Polis i e tim tékniko i táktiko di reshèrshi ku a presentá na e sitio i e sera e sitio kaminda e delito a tuma lugá pa hasi investigashon. NOTA: Texto ta scirbi den Papiamento fonetico di Corsou.