Wever: Movimiento Electoral di Pueblo (ta) cla pa siguiente eleccion!

ORANJESTAD – ‘Partido Movimiento di Pueblo (MEP (ta) cla pa e siguiente eleccion!”. Asina lider di partido geel Evelyn Wever Croes a termina su mensahe di prensa cortico di menos di 2 minuut diadomingo anochi, riba e tension cu tin entre nan y partido di coalicion RAIZ. E partido a tene un partijraad extraordinario pa trata varios tema y sigur e tema cu tin tur hende pendiente, cu ta e proximo presidencia di Parlamento. Wever a bisa tambe durante e mensahe, cu partido a postula nan nomber pa presidencia, pero cu nan lo a participa esaki prome na e partido RAIZ y no bisa esaki publico. Esta no ta cla si Edgar Vrolijk un biaha mas lo ta e candidato como e proximo presidente. E reunion pa vota pa un presidente y vice presidente di Parlamento ta poni pa 9am dialuna mainta. 

EDGARD VROLIJK TA KEDA?

Edgar Vrolijk despues a declara na prensa cu e ta ok kico cu pasa, sin duna confirmacion si e mes ta e candidato un biaha mas pa presidencia. E forma con Vrolijk a papia ta duna indicacion cu e candidato por ta un otro persona tambe, y cu Vrolijk lo ta ‘ok’ cu ken cu bira e persona. Tambe e la papia riba su record como presidente y cu esey ningun hende por kita di dje. Cu esaki, e ta mustra cu e ta contento cu su trabou, y kico cu pasa, e ta ok cu ne. Esey hopi a interpreta como un forma di prepara pa un posibel cambio, esta cu no ta sigur cu Vrolijk lo ta e candidato un biaha mas. 

TENSION

For di diahuebs a surgi e ‘tension’ entre e partnernan di coalicion MEP y RAIZ ora cu RAIZ su miembronan a laga sa (lesa; Misha Raymond), cu e fraccion (sostene pa e partido) lo no vota pa Edgard Vrolijk bolbe como presidente di Parlamento. Esaki a crea un problema ya cu e partido geel a sigura despues publicamente via rednan social, cu nan ta sostene e presidente actual, y manera ta e modus operandi di e partido, cada miembro a post algo similar riba nan pagina respectivo, elogiando Vrolijk y sosteniendo e como e presidente. Mes momento, oposicion (y RAIZ tambe) a cuminsa vocifera riba nan pagina, nan malcontento cu nan tabatin pa cu e situacion di Vrolijk. 

VARIOS REUNION

Varios reunion a tuma lugar den fin di siman den seno di cada partido, pa asina wak si por remedia e situacion prome cu dialuna. Diadomingo anochi durante e reunion di MEP, nan a laga sa cu nan tin nan candidato y cu nan lo participa esaki na RAIZ. RAIZ di su banda a tene nan conferencia diadomingo anochi tambe, y un biaha mas sigura cu nan no ta sostene Vrolijk, pero alavez no ta pro un caida di gobierno. Y cu e unico cu MEP tin cu haci, ta cambia e nomber di presidencia y nan lo ta OK cu ne. Basta cu e no ta Vrolijk.