Bikker cu carta pa Valero pa para desmantelacion

ORANJESTAD – Parlamentario y lider di partido Democracia Real, Andin Bikker, a manda un carta urgente caminda e ta expresa e deseo pa Valero Energy Corporation para su plan pa desmantela e refineria. Asina e ta informa den un comunicado den fin di siman. Bikker a manda e carta den luz di entre otro e mocion presenta pa su persona recientemente den Parlamento, cual a wordo acepta unanimamente, pa institui un comision special pa explora e posibilidadnan di re-apertura di e refineria.

NOTICIA DESMANTELACION

Bikker ta haci mencion tambe di e hecho cu e siman cu a pasa, e ehecutivo halto den Valero, sr. Bill Day, a expresa na NoticiaCla.com entre otro, cu Valero lo no tin intencion di para su plannan pa desmantela e refineria. “ E noticia aki a trece hopi confusion, ja cu e ta contradeci loke e Minister encarga cu asuntonan di Energia a declara” Bikker a bisa den su comunicado. Fuera di esey, si Valero no para e desmantelacion y pone on hold, e mocionnan cu Parlamento a aproba ta core risico di perde sentido y ta bira mas dificil pa interesa companianan pa inverti den e refineria.

INTERESADO

Segun e parlamentario, e noticia cu Valero lo kier sigui cu e desmantelacion a sali net un par di dia prome cu a bira conoci cu Citgo Petroleum Corporation lo ta interesa den e refineria. No por exclui cu dor di interes di Citgo mas companianan petrolero lo expresa of confirma nan interes pa cu e refineria. Pues e ora ta importante cu Valero para su intencion di desmantela e refineria y duna espacio pa explora e re-apertura.

REACCION

Apart di esey aparentemente Valero lo no ta reaccionando riba invitacion di San Nicolas Business Association pa bin duna informacion riba e futuro di e refineria den un town hall meeting.

CARTA

Tumando nota di tur esaki Parlamentario Andin Bikker a dicidi di dirigi un carta directo na e Team Ehecutivo di Valero Energy Corporation, expresando un deseo pa Valero pa pone su plan pa desmantela e refineria on hold pa por explora e posibilidadnan di un posibel re-apertura. Por lesa e carta aki.