Prome Minister: Agredi y insulta nos bishitantenan ta contra nos principionan

ORANJESTAD - Agredi y insulta nos bishitantenan ta contra nos principionan. Asina prome minister di Aruba Evelyn Wever a bisa e siman aki, como un reaccion mas di otro gobernante riba e incidente di fin di siman unda cu algun activista local a confronta un grupo di turismo den un forma negativo. E mandatario a bisa cu e ta compronde e preocupacion pa cu e ‘overtourism’ pero ta algo cu nan tambe ta bringando, pero den corte. “Nos ta sigui bringa cada caso den corte. Nos tampoco kier “overtourism” na Aruba. Tin proyectonan grandi cu ya lo wordo finalisa e aña aki. Ainda tin algun den ‘pipeline’ cu e permisonan duna door di e gobierno anterior y cu no por a wordo kita, pero despues di esey no tin mas. E preocupacion di e pueblo ta conoci cerca nos Gobierno y nos ta comparti esaki, pero agredi y insulta nos bishitantenan no ta e solucion, e ta contra nos DNA, contra nos principionan. Nos ta un pueblo cordial, laga nos corda esey prome tur cos. Laga nos semper ta cordial cu nos mes localnan y cu nos turistanan, esey ta un caracteristica cu ta distingui nos y ta haci nos grandi. Hunto nos lo traha y yega na un solucion y sigui padilanti construyendo un Aruba miho pa nos tur”, e mandatario a bisa.