ATIA a celebra su 70 aña di existencia den gran forma

ORANJESTAD - Recientemente den un recepcion na Alhambra Ballroom, Aruba Trade and Industry Association (ATIA) a celebra su 70 aña di existencia. Funda na aña 1945 cu e obhetivo principal pa proteha e interes di su miembronan, ATIA a wordo promove un ambiente comercial di calidad halto y un clima di inversion riba nos isla. E anochi a habri cu palabranan di Sr. James Fazio, CEO di Aruba Airport Authority (AAA), sigui pa chairman di ATIA, Sr. Michel Henriquez kende a refleha riba ATIA su 70 aña di existencia.

DON MANSUR

Durante e celebracion, ATIA a gradici su miembronan, miembronan di hunta di directiva y past presidents pa nan aporte y apoyo den e ultimo decadanan. ATIA a presenta un reconocimiento honrando Sr. Elias Fernando Mansur, mihor conoci como “Don Mansur” pa su añanan di dedicacion y contribucion valioso como President di ATIA na añanan 1976 te cu 1978.

GRADICIMENTO

Por ultimo, director di ATIA Sr. Igmar Reyes a duna palabranan di gradicimento na e comunidad comercial y tur cu a aporta y a pone confianza den ATIA. ATIA lo continua cu su aporte na defini un clima socioeconomico di Aruba y ta spera di sigui surpasa e expectativanan di su miembronan pa futuro. E celebracion di 70 aña di aniversario a bay den un ambiente hopi ameno y a conta cu presencia di gobernador y varios past presidents. ATIA kier gradici Aruba Airport Authority (AAA) pa haci e celebracion aki posibel. Wak un video exclusivo di ATIA riba su celebracion. E ta contene entre otro entrevista cu presidentenan di pasado manera Ebby Arends. Mira e video aki.