Oduber: Accion di activistanan contra turista na Baby Beach tabata ‘agresivo y perhudicial’

ORANJESTAD – E accionan di algun activista na Baby Beach, a keda califica como ‘ agresivo y perhudicial’. Asina e minister encarga cu turismo Dangui Oduber a bisa e siman aki. Alabez e la urgi na reflexion riba e impacto di tal comportacion contra e turismo di Aruba. Por ultimo e minister a expresa: “Un biaha mas nos ta lamenta e tipo di e accionnan aki, cual mi ta considera como accion violento, accionnan agresivo y un atentado contra nos turismo.”

KICO A PASA

Un grupo di activista local den fin di siman, a bay reclama algun turista cu nan tabata coi espacio publico pa nan, y a haci esaki den un forma di protesta. E turistanan na nan turno, a protesta contra esaki y e la bira un tipo di confrontacion entre e dos gruponan aki. Manera ta conoci, tin grupo di hende cu ta keda insisti cu no mester di mas hotel y cu tin mucho turista tambe. Y e biaha aki, a opta pa protesta di e forma aki, esta di confronta un grupo di turista, pa mustra e malcontento.