Arends: San Nicolas ta haya mercado local como parti di proyecto di revitalisacion

ORANJESTAD - San Nicolas ta haya mercado local como parti di proyecto di revitalisacion. Asina minister Ursell Arends (RAIZ) a anuncia dialuna durante un conferencia di prensa  

MERCADO LOCAL 

Fase 1 di e proyecto lo inclui e creacion di un mercado local, destina pa sirbi como un atraccion nobo pa bishitantenan y un plataforma vital pa nos agricultor y productor local. E Sunrise Market lo ta situa den e parkeerplaats actual di Arubus, y lo inclui espacio dedica pa no solamente artesania, pero tambe pa productonan local cu hopi di nan a anhela pa asina nan por bende den un forma mas consistente y accesibel.

PETICION

Pa hopi tempo, a yega peticion for di comunidad pa haya un espacio cu por promove e mercado local, y cu e proyecto aki, Minister Arends ta mustra e compromiso firme pa atende e necesidad aki. E creacion di e Sunrise Market ta un paso importante den e direccion di diversifica e atracionnan di San Nicolas, y brinda un sosten pa e agricultor y productor local cu tanto mester di un plataforma manera e Sunrise Market pa por crece y prospera.

UPGRADE PA STACION DI BUS

Adicionalmente, e proyecto ta inclui mantencion y “upgrade” necesario na e stacion di bus na San Nicolas, creando un espacio mas atractivo pa peaton y pa turistanan. E Sunrise Market lo no solamente fungi como un atraccion turistico, pero e localnan di e area tambe lo haya beneficio di e disponibilidad mas frecuente di productonan fresco y local, asina stimulando e industria di nos productor local y duna nan un chens mas grandi pa progresa.