Envez di detene, Mongolia a ricibi presidente ruso Putin festivamente

MONGOLIA - Presidente Ruso Putin a wordu ricibi festivamente na Mongolia pa su homologo Ukhnaagiin Khurelsukh. Mongolia ta miembro di Corte Penal Internacional (ICC), cu a emiti un orden di aresto pa Putin aña pasa, pero Mongolia no a cumpli.

Ora cu Putin a yega Mongolia ayera, el a wordo saluda pa un guardia di honor militar. Awe el a topa presidente Khurelsukh den e plaza principal dilanti di Palacio di Gobierno den e capital Ulaanbaatar. Einan un banda a toka cantikanan folklorico ruso y mongol den presencia di sòldanan mongol riba cabai. Despues e dos lidernan a drenta e edificio di gobierno.

Ukrania ta rabia y ta acusa Mongolia di ta complise den e crimennan di guera di Putin. E Ministerio di Asuntunan Exterior di Ucrania ta yam’é un sla grandi pa ICC cu Mongolia no a logra aresta Putin. 

NO PA SUR AFRICA

Putin ta bou di un ordo di aresto internacional for di maart aña pasa pa motibo di crímennan di guera di Rusia na Ukrania. Como miembro di ICC, Mongolia tin e deber di aresta e presidente ruso. Si e pais no haci esei, un hues di ICC por referí e asunto na e estadonan miembro di e corte, cu por dicidí riba “medidanan apropia”.