Mariniernan a subi Eagle Beach como parti di entrenamento

ORANJESTAD – Mariniernan (incluyendo di Aruba) a subi Eagle Beach diabierna mainta, como parti di un ehercicio. Nan a cuminsa nan ehercicio riba e bapor hulandes Karel Doorman, cu a wordo uza pa operacionnan anfibio. Un total di cuater FRISC’s, cuater bapor super lihe a sali for di Karel Doorman, rumbo pa Eagle Beach, cu abordo mariniernan di e 32 raiding squadron. A uza e helicopter Cougar tambe durante e operacion aki. Gobernador di Aruba Freddis Refunjol y director di gabinete tambe tabata presente pa e operacion aki. 

EHERCICIO

Prome cu nan a sali pa Eagle Beach, nan mester a completa varios tipo di rutina, manera colecta nan arma, y staciona riba lugarnan specifico. Finalmente nan por a subi tera, unda cu nan mester a sigui pa un hotel riba e strip pa atende cu un situacion volatil di un manifestacion violento. E operacion a logra exitosamente cu asistencia di polis di Aruba y Guarda Costa.