Szabo: Aruba tin industria turistico gigantesco, pero tambe problema ecologico gigantesco

DEN HAAG – Aruba mester busca un balansa entre e industria turistico y e situacion di medio ambiente. Esey ta por lo menos e pensamento di e secretario di estado nobo Hulandes Zsolt Szabo diabierna riba un pregunta di Tito Lacle na e mandatario durante un conferencia di prensa despues di e Conseho di Minister di Reino. E mandatario ta basa su pensamento riba su bishita recien na Aruba y di loke a hala su atencion. 

A HALA ATENCION DI MANDATARIO

E mandatario a haci un recorido na e isla y a keda impresiona cu e industria turistico gigantesco cu Aruba a sa di desaroya. Pero mes momento, e la mira tambe e cero na loke ‘tabata’ dump y ta considera e problema ecologico di Aruba tambe como algo ‘gigantesco’.  

BALANSA ENTRE TURISMO Y MEDIO AMBIENTE

“Tin un industria turistico gigantesco (na Aruba:red)  pero tambe tin un problema ecologico gigante. Mi no ta bay sinta riba stul di gobernantenan na Aruba, pero tampoco riba e stul di organisacionan turistico” e mandatario a sigui bisa. “Pero lo ta bon pa bin un balansa, unda cu e sector turistico mester compronde cu ora cu nan kier manda turistanan pa Aruba, pa nan tin e responsabilidad importante tambe pa asuntonan ecologico” Szabo a sigui bisa. “Bo mester hacie hunto, y bo mester traha un isla bunita hunto, mantene bunita, tanto pa e habitantenan y e turistanan cu ta bin” e mandatario a bisa finalmente riba e tema. NOTA: E potret ta di archivo di Noticiacla durante un entrevista exclusivo cu e secretario di estado durante su bishita na Aruba.