Koepel fondonan di pensioen un hecho

WILLEMSTAD – For di fin di mei tin un koepel di fondonan di pensioen den Antianan hulandes y Aruba, cu lo carga e nomber CaPAs. CaPAs ta para pa Caribbean Pension Funds Association. E lantamento di a koepel a tuma varios luna di preparacion. E idea di e koepel ta iniciativa di 7 fondonan grandi di pensioen, cualnan ta Algemeen Pensioenfonds van Curacao (APC), Algemeen Pensioenfonds van Aruba (APFA), Algemeen Pensioenfonds van Sint Maarten (APS), Pensioenfonds Caribisch Nederland (PCN), e fondonan di Banco Maduro (MCB) y Caribbean Mercantile Bank (CMB) y Stichting pensioenfonds Vidanova. E fondonan di pensioen tur ta wordo confronta cu retonan importante, ora ta trata hacimento di inversion, supervision door di banconan central, ‘corporate governance’ y educacion permanente.

Tambe por bisa cu e fondonan di pensioen tur tin cu enfrenta asuntonan similar, ora ta trata di e echo cu hendenan ta biba mas largo y e fluctuacion nan riba mercadonan financiero. Door di coopera cu otro bou di e koepel, e fondonan tin confiansa cu nan por yega na funcionamento aun mihor y haci e sector den su totalidad mas fuerte, mientras cu ta pidi atencion di e “stakeholders” pa varios problematica.

E directiva, cu ta consisti di representante di e diferente fondonan, ta wordo representa pa e directora di APC, Evelyn S. Kruithof-Bor como presidente di e directiva, Sheila Van Veen, director di APFA como presidente suplente y Clementine Wallé, director di e fondo di pensioen di MCB como tesorero. CaPAs pronto lo cuminsa cu e proceso pa recluta otro fondonan di pensioen pa afilia nan mes na e koepel. Tambe CaPAs lo traha pa organisa diferente curso y seminario pa e sector di pensioen. E fondonan di pensioen, den nan esfuersonan pa yega na un koepel di fondonan di pensioen, a ricibi ayudo di e oficina di Montae Caribbean, cu ta specialista den materianan di pensioen. Personanan of instancianan cu kier bin den contacto CaPAs, por manda un email pa: info@pensioenkoepel.org.