Gobierno ta apela e decision di corte cu APFA a gana riba salario maximo (LNT)

ORANJESTAD - Manera ta conoci, Corte di Prome Instancia, riba 28 di augustus 2024, a dicta un sentencia na fabor di Stichting Algemeen Pensioenfonds Aruba (APFA), den e caso entama pa APFA contra Gobierno di Aruba. Segun gobierno den su comunicado, ta bisa cu APFA a cuminsa un caso contra Gobierno ‘pasobra nan no ta di acuerdo cu Gobierno a introduci un ley, e Landsverordening Normering Topinkomens (LNT), den cual ta impone un maximo di salario na e directornan di entidadnan di Gobierno. E ley ta stipula cu salario di directornan no por ta mas halto cu 130% salario di Minister President’. 

Segun gobierno, Hues den prome instancia a dicta cu Gobierno no por aplica e ley di LNT pa APFA. Y pues cu no tin limite na e salario di e director di APFA. Gobierno di Aruba no ta di acuerdo cu e sentencia di hues, y lo apela e decision. 

Gobierno a recorda cu na aña 2022, e la pasa un ley na unda ta pone un salario maximo pa directornan di e companianan y institutonan di Gobierno. E motibo pa cu esaki ta, cu tin varios compania estatal y/of instituto na unda e directornan ta gana salario di 3 à 4 biaha mas hopi cu salario di ministernan, sin tin e mesun responsabilidad di un mandatario. 

A base di esaki, mirando cu ta institutonan di/pa Gobierno, a introduci loke ta yama e Wever-Croes norm, cu ta un maximo di 130% di e salario di e ministernan. Varios instituto no a bay di acuerdo cu e ley aki, y a opta pa entama un caso contra Gobierno di Aruba, di cual nan a haya rason siman pasa. Pero ta bon pa nota, cu manera cu Noticiacla a compronde, no ta tur instituto a haya razon, sino solamente APFA pa nan posicion specifico. Igual, gobierno a laga sa diadomingo cu nan no ta di auerdo cu esaki, y lo apela e decision y evaluacionnan haci door di hues, y lo pone esaki na evaluacion di Corte di Husticia den cual 3 hues independiente lo reevalua e caso.