Renske Pin: Discusion di calidad di prensa den nos region

ORANJESTAD – Similaridad riba tereno di prensa entre Aruba y Corsou ta bastante. For di e concepto di noticia, te na e problema di posibel cultura di miedo pa raporta un trabou di un periodista. Un sin fin di asunto a bin dilanti durante un lectura riba e tema “Media en Journalistiek in small island developing states: De Curacao Casus’”. E orado invita pa esaki tabata Rense Pin, un investigador di media pa UNESCO, basa na Corsou. Pa un publico consistiendo grandemente di periodistanan local, combina cu interesadonan den e mundo di prensa, Pin a trece un discusion entre esnan presente cu a pone cu el a keda sorprendi. Sigur cu e cantidad di pregunta ricibi na final di su presentacion y e combersacion cu a sigui.

NIVEL

Nivel di periodismo, nivel di e comunidad y kico ta noticia tambe a haya oido e anochi ey. A resalta den e sala despues cu esnan cu no ta den e medio, ta precupa cu e nivel di periodismo, y e tipo di informacion (of falta di dje) cu tin. Algo cu no ta diferente entre Aruba y Corsou. Pa banda di periodistanan, ta resalta cu esnan cu tey, no tine facil, y ta hopi biaha haci milager cu e tempo cu nan tin pa haci nan trabou.

COMPARACION

Segun Pin, a base di e reaccion, a nota cu tin hopi comparacion cu e situacion na Corsou, ora cu ta trata asuntonan di prensa. E ta algo agradabel pa scucha, segun Pin, cu tin asina hopi similaridad entre islanan. E meta principal di Pin tabata pa lansa un comienso (iniciativa) pa Aruba pa un tipo di curso periodistico. Aunke ta acepta cu e nunca por wordo compara cu un estudio di periodismo completo, ‘e ta yuda sigur desaroya esnan cu ta den e trabou aki’. Pin a splica cu e.o. despues di inicia e investigacion extenso riba e tema, esaki a desemboca den un serie di ‘master classes’ na Corsou riba e tema, destina pa periodistanan local.

MASTER CLASSES

E trayecto largo aki a wordo sigui pa entre otro e rector di universidad, Glenn Thode cu tambe a participa dado momento como un di e instructornan. E experiencia aki a inspira Thode suficiente pa purba trece esaki tambe na Aruba. Basa riba esaki a invita Pin pa splica e loke a wordo aplica y siña na Corsou. Segun Pin, un posibel trayecto similar na Aruba lo tin hopi balor. Ta mira cu tin hopi similaridad entre e dos islanan, cu ta pone cu ‘no mester re inventa e wiel’. Reaccionnan positivo duna diahuebs anochi, tabata motivador pa Pin, y cu sigur ta un indicador pa posibel exito.

FOLLOW UP

Despues di e lectura di ayera nochi, a sigui awe un tayer unda cu ta haci un quick scan basa riba e indicadonan pa Aruba, y unda cu ta bay repasa e loke a sosode na Corsou, y con pa aplica e metodo ey cu un cantidad di stakeholders interesa di Universidad di Aruba. Esey ta e prome paso pa un posibel master class na Aruba ta posibel proximamente.