E pakico a cuminsa eherce mas control riba ilegalidad

ORANJESTAD – E siman aki, manera raporta, autoridad a cuminsa actua cu man duro riba negoshinan cu ta emplea posibel persona ‘indocumenta’. Varios di nan a haya chens pa regla nan cosnan, mientras cu otronan a keda deteni, cla pa wordo deporta. DIMAS na su turno ayera a recorda (pa medio di un comunicado) e reglanan cu tin pa tanto negoshi y personanan cu tin un permiso, y kico mester tene na cuenta. “Cu excepcion di personanan pa ken e LTUV (ley di admision y expulsion) no ta aplicabel of tin admision segun ley, tur otro persona ta rekeri segun ley di tin un titulo di estadia pa permanence na Aruba” DIMAS ta cuminsa na bisa.

OBLIGACION

Esey ta nifica cu ‘tur persona cu tin permiso di estadia temporario of pa tempo indefini. tin e obligacion segun ley pa cana cu nan permiso y tambe un identificacion valido na tur momento y tur e obligacionnan di mustra e funcionario encarga cu control di LTUV’. A informa tur instancia cu a wordo bishita e siman aki di e regla aki un biaha mas.

LEGAL OF ILLEGAL

Entre e mensahe duna, a splica cu esun cu ta actua encontra di nan permiso di estadia temporal of indefini segun ley di LTUV, ta igual na un persona cu no tin un estadia legal na Aruba.

Esaki ta significa cu si un persona su permiso ta specifica cu e no mag di traha, e no mag di eherce ningun tipo di trabou, ni pa su mes ni pa un otro persona. E ta significa tambe cu na momento cu su permiso ta specifica cu e mag di traha, cu esaki ta mara na un dunador di trabou specifico y un funcion specifico. Si e persona ta eherce un otro tipo di trabou of ta traha pa un otro dunador di trabou e persona ta actuando en contra di su condicionnan di permiso di estadia.

CONSECUENCIA

Y pa esnan cu no cumpli, tin e consecuencia. Y como tal DIMAS ta splica cu un persona cu ta actua en contra di su permiso mester ta conciente cu tin consecuencianan acopla na esaki. Sancionnan pa cu esaki lo por ensera cu e su permiso lo por wordo revoca, cu un siguiente permiso lo por wordo nenga of cu e lo por wordo deporta.

Tambe ley ta acopla consecuencia na esun cu a laga e persona traha cerca dje mientras cu e no tin un permiso of no tin permiso pa traha eynan of den e function ey.

TERMINACION DI AMNESTIA

Hopi ta puntra pakico diripiente y no a actua antes, ta lubida cu minister di integracion Benny Sevinger a duna pa 5 aña largo (2010 - 2014) na esnan cu tabata residencia na Aruba caba pa mas cu 5 aña, e oportunidad den forma di un permiso di amnestia, pa por regla nan estadia legal. Den e periodo aki un amnestia special a wordo duna na e personanan cu por a cumpli cu e rekisitonan di e maneho aki.

IMPLEMENTACION CONTROL

“Awor cu a duna tur espacio na e personanan indocumenta pa drecha nan estadia legal y keda den e ciclo legal, lo bay over implementa controlnan pa cu e cumplimento di e ley di admision”

EHERCE CONTROL

Na e momento cu ta eherce control y cu wordo constata cu un persona no ta cumpli cu e rekisitonan di ley, lo bay over na tuma accionnan necesario. En corto esaki ta ensera deportacion di e persona indocumenta y duna multa administrativo na esun cu a emple’e impugna cu e ley di admision.