Hefe di e app Telegram, Pavel Durov persigui na Francia, y no tin mag di bandona e pais

PARIS - E fundador di Telegram, Pavel Durov, ta wordo persigui na Francia. Autoridadnan frances a informa esaki despues cu Durov mester a presenta den Corte awe tardi. Durov ta wordo sospecha di complicidad den permiti actividadnan criminal, incluyendo abuso di mucha y traficacion di droga, via e plataforma Telegram.

E multimillonario di tecnologia Ruso a wordo aresta na Francia diasabra ultimo despues di a baha na un aeropuerto cerca di Paris cu su avion priva for di Azerbaijan. E fundado y CEO di Telegram a keda aresta debí na un investigacion andando dor di e unidad di crimen cibernetico frances y e agencia nacional di fraude. El a wordo interoga y teni pa cuater dia prome cu hib’e awe huez pa dicta sentencia riba e investigacion.

Durov a paga un fiansa di 5 miyon euro y awor por warda e huicio den libertad. E mester keda na Francia y meld na warda di polis dos biaha pa siman.

CRIMINALNAN

E investigacion ta enfoca riba e app di combersacion Telegram. E app, cu ta wordo usa pa alrededor di 700 miyon hende rond mundo, ta un paradijs pa criminalnan, segun hustisia frances.

E autoridadnan frances ta kere cu Telegram no ta haciendo suficiente pa combatí practicanan criminal. Por ehempel, casi no tin moderacion y e compania no ta coopera den investigacionnan criminal; por ehempel, e no ta comparti e identidad di e sospechosonan cu autoridadnan. Ta ser bisa cu Durov tabata riba un lista di buskeda Frances, segun e canal di television TF1.

'ABSURDO'

Segun e website Mericano Politico, tambe tin un orden asina pa e ruman di Durov, Nikolaj. E ta co-fundador di Telegram y tambe ta wordo bisa cu e ta parti di e investigacion. No ta cla si husticia Frances sa unda Nikolaj ta kedando. E ordo di aresto pa Durov y su ruman homber a wordo bisa cu a wordo emiti caba na maart.

Telegram mes a haya e detencion di e CEO “absurdo” y a bisa cu Durov no tin nada di sconde. E embahada Ruso tambe a bisa cu lo tuma “pasonan inmediato” despues di e detencion y a exigi mas claridad. Presidente Frances Macron a informa cu e detencion en todo caso no tabata motiva politicamente.

Pavel Durov a nace na Rusia, pero a huy for di e pais despues di un conflicto cu estado riba e plataforma VK, un version Ruso di Facebook. Durov tambe ta e fundador di e plataforma ey hunto cu su ruman y a nenga di cera canalnan di oposicion riba VK. El a muda pa Dubai i, segun medionan franses, awor tin nashonalidat franses i emirati ademas di ruso.