Na Corsou, definitivamente Gerard lo baha pa Larmonie-Cecilia drenta Parlamento

WILLEMSTAD - Apesar di tur duda i diferensianan di opinion ku por tin den partido, lider polítiko di Partido Nashonal di Pueblo (PNP), Ruthmilda Larmonie-Cecilia ta bai drenta parlamento. E lo drenta na lugá di Elvin Gerard ku ta baha i bira kolaboradó di frakshon di PNP.

Ki dia eksaktamente e kambio den parlamento aki lo tuma lugá no ta konosí ainda. Gerard no a manda su karta di retiro aden ainda pa presidente di parlamento mirando ku no a finalisá ku reunion interno di partido riba entre otro e tópiko aki.

Ta for di djaluna último tabatin un reunion di partido pa duna informashon riba último desaroyonan polítiko. Despues di e reunion a palabrá ku lo sigui deliberá den seno di sierto órganonan di partido.

Pero e parlamentario, sin ke bai den muchu detaye ta konfirmá pa EXTRA ku ta definitivo ku e lo baha komo parlamentario. “Mi ta hasié tambe p’ami salú. Mi ta mas trankil i por dediká mi mes mas mihó riba mi salú”, Gerard ta bisa.

E tabata resien na Colombia pa un operashon ku e ta rekuperando for di dje. Tambe Gerard ta diabétiko.

Gerard ta hañando hopi apoyo di amigu i famia pa su desishon di baha pa asina laga lider polítiko drenta. El a risibí kantidat di yamada i mensahe via WhatsApp ku ta sostené den su desishon i ku e ta demostrá ku e no a drenta parlamento ku e meta pa saka probecho finansiero propio.

Despues ku Gerard entregá su retiro parlamento lo informá Konseho Supremo Elektoral di esaki. E konseho lo inisiá ku e proseso ofisial pa konsulta lista di PNP pa elekshon na 2021 pa wak ken ta e kandidato ku ta drenta parlamento.

Number 1 riba lista ta Larmonie-Cecilia ku lo indiká pues ku e ta aseptá pa drenta parlamento. Konseho Supremo Elektoral seguidamente lo traha riba kredensial di e kandidato i manda esaki pa parlamento. Presidente di parlamento lo yama un reunion pa asina un komishon di 3 parlamentario revisá e kredensialnan, parlamento bai di akuerdo ku esakinan.

Unabes ku esaki tuma lugá Larmonie-Cecilia por hura dilanti gobernadó pa despues e tuma asiento den parlamento. E lider polítiko di PNP huntu ku dos otro minister di e partido, Ornelio ‘Kid’ Martina i Ruisandro Cijntje a entregá djárason 21 ougùstùs nan retiro. Esaki despues ku a surgi un kiebro den e koalishon di MFK i PNP.

Frakshon di MFK den un karta pa direktiva di partido a informá ku e no tin konfiansa mas den parlamentarionan di PNP, Sheldry Osepa i Gwendell Mercelina. Polítiko di MKF i alabes promé minister, Gilmar ‘Pik’ Pisas den reunion di Konseho di Minister 21 ougùstùs último a duna Larmonie-Cecilia e karta bisando ku e mester skucha di su frakshon. Larmonie-Cecilia a kontestá ku e tambe mester respetá frakshon i no por laga PNP kibra den dos pasobra frakshon di MFK no ke traha mas ku dos miembro di e frakshon di PNP. NOTA: Texto ta scirbi den Papiamento fonetico di Corsou.