Resultado feitenonderzoek keho na Scol Kudawecha cla y entrega

ORANJESTAD – E resultado di e ‘feiten onderzoek’ riba e keho contra un maestra di Scol Preparatorio Kudawecha a keda cla, te cu a tuma e pasonan caba. E rapport mientrastanto a keda entrega na minister di enseñansa Michelle Hooyboer Winklaar. E ta contene no solamente e keho oficial cu pero cu tambe a wordo pidi pa investiga dicon e situacion por a yega asina leu y duna recomendacionnan pa futuro pa evita cu algo asina aki lo por bolbe pasa. Awor cu e resultado ta conoci, a tuma e pasonan necesario. Pero e minister a splica NoticiaCla.com cu e pasonan tuma, ta keda ‘confidencial’ pasobra ‘ta trata di un asunto entre doño di trabou y su trahado. E no ta un asunto publico’. Esey no obstante cu e asunto mes a genera hopi publicidad. E comision ta consisti di profesionalnan den e ramo di enseñansa y tereno social for di organisacionnan cu ta cay bou di tanto Ministerio di Asuntonan Social como Ministerio di Enseñansa. Desde e momento cu a instala e comision a wanta tur medidanan tuma contra e maestra concerni.

SCUCHA TUR HENDE

Tabata importante pa scucha tur esunnan envolvi y pa e motibo aki a comision a hiba combersacionnan individual cu tur esunnan cu ta directamente of indirectamente envolvi den e caso di Scol Primario Kudawecha, incluyendo e personal di e scol. E punto di salida di e comision tabata cu cooperacion na e investigacion ta a base boluntario y cu ta trata tur informacion na un manera discreto y confidencial. Por bisa cu mayoria persona a coopera cu e investigacion.

ENTREGA DI RAPPORT

Compilando tur informacion cu a sali for di e combersacionnan/entrevistanan e profesionalnan a inventarisa tur e hechonan, yega na conclusionnan y recomendacionnan y nan a entrega nan rapport final dia 15 di juni ultimo na Minister Hooyboer-Winklaar. Mientras tanto e maestra concerni a ricibi e informacion via su abogado y conforme palabracionnan haci.

PARLAMENTO

Minister a manda un copia di e rapport pa Parlamento di Aruba y pa SIMAR, e sindicato cu ta representa maestronan di scol. Pa por garantisa discrecion y un caracter confidencial, te asina leu cu ta posibel, a traha un version anonimo di e rapport caminda a laga tur nomber di esunnan cu a wordo entrevista afo.

CASO DELICADO

Manera enfatisa for di dia cu e keho a drenta Minister Hooyboer-Winklaar no ta bay den detaye di e caso y consecuentemente di e rapport. Esaki pa motibo cu ta trata di un caso delicado cu ta trata mucha menor di edad, maestro y leiding di scol. Mes cos cu tur otro caso e caso aki merece discrecia, tanto pa alumno y mayornan, maestro y leiding di e scol. Ademas ta trata di un caso entre un doño di trabou, den e caso aki Dienst Publieke Scholen cu ta resorta directamente bou di Minister di Enseñansa, y un di su trahadonan.

DERECHO DI TUR MAYOR

Finalisando Minister Hooyboer-Winklaar ta enfatisa cu tur mayor na Aruba tin e derecho y hasta e obligacion di sali na defensa di nan yiu y proteha nan yiu, mescos cu tur maestro tin e derecho pa defende nan mes contra cualkier acusacion.