Kvk cu bishita di embahador hulandes na Colombia

ORANJESTAD - Camara di Comercio di Aruba (KvK) a ricibi bishita di embahador di Hulanda na Bogota, Colombia, señor Robert van Embden acompaña pa representante di attache economico señora Anna van Zoest y señora Eleisah Williams di departamento di relacion exterior.

Vice-presidente di KvK señora Julisa Arends-Hoevertsz a ricibi e delegacion y a gradici e embahador pa su bishita. Durante un almuerzo ameno y informativo a intercambia ideanan pa estrecha e lasonan comercial entre Aruba y Colombia y duna apoyo na comerciantenan local cu ta interesa den e mercado di Colombia.

Un di e tareanan principal di KvK ta pa promove comercio. Den cuadro di esaki KvK ta ricibiendo tambe bishita di un delegacion comercial desde Colombia na final di luna di Juni. Na e momento aki ta trahando riba e programa di 'matchmaking' cu companianan local y ya caba a ricibi hopi interes di parti di comerciantenan local pa topa cu e delegacion di Bogota.

Pa mas informacion tocante e posibilidad pa conecta cu cu e companianan di Colombia cu lo ta na Aruba por tuma contacto cu departamento di Business Support na KvK na telefon 5821120.