CNCS a introduci e Florin Caribense inspira pa bida bou di awa

WILLEMSTAD - Ayera nochi Centrale Bank van Curaçao en Sint Maarten (CBCS) a organisá dos evento simultáneo na Kòrsou i Sint Maarten, kaminda diseño di e biyete- i monedanan nobo di florin karibense a keda revelá pa di promé bes. E diseño ta inspirá pa bida bou di awa, ta loke ku sra. Leila Matroos-Lasten di Banko Sentral a duna di konosé. El a splika ku Piská den laman ta landa liber i sin frontera, i esei ta un bon manera pa simbolisá e union ku ta eksistí entre Kòrsou i Sint Maarten, e dos paisnan di nos union monetario. E gran variedat di kriatura úniko ku ta biba den nos awanan ta kòrda nos ku, maske kada ken tin su propio identidat, e kolaborashon i e ophetivonan ku tin en komun ta uni nos. Na banda dilanti di e biyetenan, por mira e briante bida marítimo nativo di Kòrsou i Sint Maarten, miéntras ku nan banda patras ta mustra algun monumento históriko i kultural importante di ámbos pais. Kada biyete di florin karibense (abreviá komo ‘Cg’) tin otro koló. Riba e biyetenan di Cg 10, koló hel ta predominá. E figuranan prinsipal na banda dilanti di e biyetenan di Cg 10 ta karkó i e piská chamba. Banda patras, por mira e faro históriko di Klein Kòrsou. Riba e biyetenan di Cg 20, koló blou ta predominá. Banda dilanti por mira chuchu águila i un kokolishi kouri, miéntras ku banda patras, por mira e lagun ekológikamente importante di Simpson Bay. E biyetenan di Cg 50 ta predominantemente bèrdè, ku turtuga blanku i e kokolishi Arcopagia fausta, i banda patras, e magnífiko playa Kenepa Grandi. Gutu barika kòrá i kokolishi di músika ta aparesé na banda dilanti di e biyetenan di Cg 100, ku ta koló kòrá, i banda patras por mira e singular edifisio di Courthouse na Sint Maarten. E biyetenan di Cg 200 ta predominantemente püs, ku kabai di awa i e kokolishi Tonna galea dòrnando nan banda dilanti, i e inkonfundibel Brùg di Ponton na banda patras.

E monedanan di florin karibense di Kòrsou i di Sint Maarten tin un diseño paresido, pero nan no ta idéntiko. Tur dos sèt di moneda lo sirkulá tantu na Kòrsou komo na Sint Maarten. Na banda dilanti di e monedanan di Cg 5 i Cg 1 florin, tin imágen di Rei, huntu ku su nòmber ‘Willem-Alexander’ i e palabranan ‘Koning der Nederlanden’. Na banda patras, e monedanan di Cg 5 i Cg 1 florin di Sint Maarten tin eskudo nashonal di e pais i turtuga blanku, miéntras ku na banda patras di e monedanan di Cg 5 i Cg 1 florin di Kòrsou por mira isla di Kòrsou, rondoná pa laman Karibe. Den e olanan tin grabá e palabra ‘Curaçao’, i dos turtuga blanku ta komplementá e diseño. E monedanan di denominashon mas chikitu, di 1, 5, 10, 25 i 50 sèn, tin un flor di asahar na banda dilanti, miéntras ku na banda patras, tin skirbí sea ‘Curaçao’ òf ‘Sint Maarten’. E denominashon ta aparesé entre e shelu i e olanan di laman Karibe, meimei di un konstelashon di tres grupo di 10 pèrla ku ta representá e fecha 10-10-10, dia ámbos pais a bira outónomo den Reino Hulandes. Dos kokolishi Arcopagia fausta ta komplementá e diseño. E elementonan akí, i tambe e ola- i pèrlanan, ta mustra ku e monedanan i e biyetenan ta kompartí e mesun tema: bida bou di awa.Na e eventonan na Sint Maarten i Kòrsou, Presidente di CBCS, Sr. Richard Doornbosch, i direktor Sra. Leila Matroos-Lasten, respektivamente, a komentá riba e kaminda largu ku e proyekto di florin karibense mester a kana pa awor, despues di sinku aña di esfuerso dirigí di parti di tur stakeholder, nos por tin un resultado bunita i na mes momento konfiabel: un valuta nobo pa e paisnan Kòrsou i Sint Maarten. Carmabi ku ta traha huntu ku Nature Foundation St. Maarten a risibí un donashon di Cg10.000.-. Segun ku e fecha di introdukshon di e valuta nobo otro aña ta yega mas serka, CBCS lo sigui duna informashon riba un base regular. Un di e materialnan ku ta disponibel awor pa yuda familiarisá públiko en general i negoshi ku e karakterístikanan di e valuta nobo ta e aplikashon ‘My Caribbean Guilder’, ku por download pa Android i iOS. Tambe, CBCS a lansa un página wep dediká na e valuta nobo: www.caribbean-guilder.com. CBCS lo kuminsá ofresé seshon di training pa e bankonan komersial i personal di tienda i pakus, preparando nan pa e biyete- i monedanan nobo, di manera ku ora e biyete- i monedanan di Cg remplasá esunnan di NAf, e transishon pa e valuta nobo por sosodé sin problema. No keda sin bishitá www.caribbean-guilder.com pa mas informashon tokante florin karibense i pa download e aplikashon ‘My Caribbean Guilder’ via Google Play òf App Store. NOTA: E texto ta scirbi den Papiamento fonetico di Corsou.