Na Corsou Zita Jeus-Leito i KEM a tene gabinete Pisas riba pia

WILLEMSTAD - Gabinete Pisas II ta bèk riba pia, pasombra nan a logra di haña partido KEM i e miembro independiente den parlamento sra. Zita Jesus-Leito pa por sostené Gabinete Pisas II por kontinuá. Esaki despues ku ayera MFK su frakshon den parlamento a informá nan lider polítiko, promé minister sr. Gilmar Pisas ku nan no ke sigui traha ku e dos parlamentarionan di partido di Koalishon, PNP. Ta trata dje parlamentarionan di PNP, Gwendell Mercelina i Sheldry Osepa. E momentu ei sr. Pisas a indiká di lo bai buska partido den parlamento pa sigui sostené nan.

Ayera presidente di partido MFK, i alabes minister di enseñansa, siensia, deporte i kultura sr. Sithree van Heydoorn a konfirmá pa Noticiacla ku MFK tin un akuerdo di disponibilidat ku partido KEM di sr. Michelangelo Martinez i e independiente Zita Jesus-Leito (eks parlamentario pa partido PAR). Sr. van Heydoorn a duna di konosé ku MFK a yega na un akuerdo i por konta ku 11 asiento pa kontinuá ku gabiente Pisas II. Van Heydoorn a bisa di no ta papia di un gabinete Pisas III, pasombra ta un restrukturashon dje gabinete tabatin. Ta sigui e 7 lunanan ku a sobra pa yega na elekshon di mart 2025 ku partido KEM i sra. Zita Jesus-Leito. E siguiente stap ta ku mester traha algun “landsbesluit” pa ku e ministernan ku ta drenta, i e kandidatonan mester keda presentá pa pasa e proseso di screen. Manera ta konosí e proseso di screen ta tuma tempu, pues van Heydoorn ta kalkulá ku aki 1 luna i algu mas, e ministernan por drenta e gabinete. E repartishon di kartera ta un pa kada un di esnan ku ta drenta, i e di tres kartera ta keda pa MFK. Pero ainda no tin repartishon di kartera, segun e presidente di direktiva di MFK.

Mas aleu van Heydoorn a bisa di a informá gobernadó sra. Lucille George-Wout di e situashon, i ku nan a logra kontinuashon ku sosten di KEM i sra. Jesus-Leito. Tanten lo tin kontinuashon di e gabinete Pisas II, kaminda lo repartí e karteranan, sperando e ministernan nobo ku lo drenta aki 1 luna. Ounke sr. van Heydoorn no ke a bisa nada di repartishon di kartera, informashon no ofisial ku Noticiacla tin ta indiká ku partido KEM lo haña e kartera di SOAW, i Zita Jesus-Leito lo haña esun di MEO.