E cantidad di morto pa motibo di dengue na Peru ta yega 242 te awor na 2024

LIMA - E siman aki Sentro Nashonal di Epidemiologia, Prevencion i Control di Malesa di Ministerio di Salubridad na Peru a informa cu e cantidad di morto pa motibo di dengue a alcansa 242 te awor na 2024, p’esei a declara den fase endemico.

Segun cifranan oficial, di 260.159 caso raporta te cu siman epidemiologico 32, e cantidad total di casonan a aumenta cu 19% compara cu e mesun periodo na 2023 y e incidencia a subi te na 762.68 pa cada 100.000 habitante.

Igualmente, te awor e aña aki, 93% di e casonan di dengue a wordo confirma pa autoridadnan di salud, pues 90% di e casonan no ta presenta señalnan di advertencia y solamente 705 ta mustra señalnan di dengue severo.

Den e sentido aki, e director general di Centro Nacional di Epidemiologia, Prevencion y Control di Malesa, César Munayco, a splica cu dengue na Peru a pasa di ta un epidemia pa un fase endemico, for di 1 di augustus ultimo, pasobra apesar cu e malesa ta ainda presente, e ta mas controla i manehabel.

Mester remarca cu na 2023 tabatin un aumento di dengue di 347% compara cu 2022, sumando 217.839 caso y 381 morto, segun datonan di e sala di situacion di dengue di Ministerio di Salud.