FBI: Iran tabata tras di intentonan di hacking di Trump i campañanan Democratico

WASHINGTON - Agencianan di inteligencia Mericano ta bisa cu Iran ta responsabel pa intentonan pa influencia e campañanan electoral. FBI, entre otro, a scirbi esaki den un comunicado.

“Nos a observa actividadnan Irani cada bes mas agresivo durante e campañanan aki, operacionnan specífico pa influencia e publico mericano i operacionnan cibernetico dirigi riba e campañanan electoral,” e comunidad di inteligencia a bisa den e declaracion conhunto.

Di acuerdo cu FBI, e iraninan a purba di haña acceso na tanto campañanan electoral republicano como democrático pa asina “sembra division i mina confiansa den democrasia.” No a anunciá si e hacknan tabata exitoso.

Confidente di Trump

E luna aki a sali na cla cu FBI ta investigando intentonan di hacking dirigí riba e campañanan di presidente Joe Biden, vice presidente Kamala Harris y candidato republicano Donald Trump. Den caso di Trump, ta bisa cu hackernan tabata exitoso y a haña acceso na e cuenta di email personal di Roger Stone, un prominente republicano i confidente di Trump.

Riba su propio medio social Truth Social, Trump a bisa cu e hackernan a logra obtene “solamente informacion publico”. Iran te awor a nenga e intentonan di hacking.