Occidental Grand Aruba Hotel ta cambia di doño

ORANJESTAD – Occidental Hotel na Aruba ta cambia di doño. Esaki a keda anuncia ayera, ora cu Barcelo Corporation Empesarial a informa cu nan a yega na un acuerdo cu BBV pa cumpra 57,5% di e capital den Occidental Hotels Management, cu ta e compania madre di Occidental Hotels & Resorts. Barcelo mes ta un nomber hotelero. Aruba a haya un mencion special, den e sentido cu Barcelo awor por ofrece e mercado aki tambe na su clientela.

UNICO DOÑO

Segun Occidental, Barcelo Group lo bira e unico doño di e cadena, unabes cu e deal madura, y cu e keda autorisa pa autoridad di Mexico, un proceso cu por dura 3 luna. Unabes cu esey ta cla, e por obtene e resto di capital y tuma e operacion diario over tambe.

EXPANSION

Occidental, fuera di tin hotel na Aruba, tin tambe na Mexico, Republica Dominicana y Costa Rica. Fuera di mencion di Aruba, Barcelo ta menciona cu e kier expande pa Colombia tambe.