SETAR y HBO cu "sneak preview" durante e fin di siman aki!

ORANJESTAD - SETAR Cable Services conhuntamente cu HBO ta ofrece un "sneak preview" cuminsando diabierna awor 19 di juni 2015 pa 8or di mainta tur cliente di Cable Digital cu no tin HBO & MAX Premium (canal 200 – 210 di Cable Digital y canal den High Definition 361 – 370 den HD) den nan pakete por disfruta di tur e canalnan aki sin ningun gasto adicional. Esaki ta obtenibel te cu diadomingo dia 21 di juni pa 12or di anochi.

TRUE DETECTIVE

E fin di siman aki ta uno hopi excitante pa loke ta trata programacion riba HBO & MAX Premium como cu e di 2 "season" di e conocido serie "True Detective" cu ta inicia diadomingo 21 di juni proximo pa 9or di anochi riba canal HBO East 200. E biaha aki e lo tin personahenan nobo manera Rachel McAdams cu ta Sheriff y detective di Ventura County cu hopi biaha no ta di acuerdo cu e e sistema juridico cu e mes ta sirbi den su funcion como oficial di justicia, Colin Farrell den e rol di un detective comprometi, Vince Vaughn como criminal y comerciante cu por perde tur loke cu e la traha pe henter su bida, mientras cu su casa y su aliado ta lucha pa nan mes un escogencia nan den bida.

"THE BRINK"

Un serie di mey ora cu lo cuminsa diadomingo 21 di juni proximo pa 10or di anochi riba e mes un canal HBO East 200. "The Brink" ta concentra riba crisis di politica y e efectonan cu esaki tin riba e 3 hombernan desespera y cu no tin ningun similaridad di otro. Tim Robbins den e rol di Secretario di estado, Jack Black como un humilde funcionario di Asuntonan di Exterior y Pablo Schreiber un piloto naval. E tres almanan aki comprometi mester lucha mey mey di tur e caos pa salva mundo for di un tercera guera mundial.

"BALLERS"

Protagonisa pa Dwayne "The Rock" Johnson, "Ballers" ta un serie humoristico di mey ora cu lo cuminsa pa 10or y mey di anochi diadomingo 21 di juni 2015. E storia di e serie ta basa su mes riba bida di hungadornan di futbol Americano di antes y esnan di awendia, asina siguiendo con e ex "superstar" Spencer Strasmore a trece su bida riba e caminda corecto durante su retiro, mientras cu e ta siña e otro hungadornan e rutina diario di e negoshi di futbol Americano.

INVITACION

SETAR ta invita tur cliente di Cable Services cu no tin e pakete di HBO & MAX Premium pa disfruta di e "sneak preview" y tur cu tin e pakete di HBO & MAX Premium pa disfruta di tur e programacionnan excitante cu tin e fin di siman aki. Pa mas informacion por tuma contacto cu SETAR na 525-1700.