Corsou ta monitoria e situacion na Venezuela

WILLEMSTAD. - Minister di Asuntunan General sr. Gilmar Pisas, komo titular enkargá i responsabel pa maneho di krísis i riesgonan ku por asotá nos pais, djamars último a reuní ku ekspertonan gubernamental den un ‘taskforce’. Meta di e reunion di e ‘taskforce’ aki tabata pa haña un bista di e situashon aktual na Venezuela despues di e elekshon presidensial di 28 di yüli último. Despues di e elekshon presidensial tabata reina un situashon di tenshon i tabatin diferente protesta i a arestá vários persona na Venezuela.

Debí na e impakto ku situashon aktual na Venezuela por tin pa Kòrsou, a opta pa mónitòr e situashon di serka pa asina por antisipá riba situashonnan ku lo por presentá i tuma akshon si esaki ta nesesario pa protehá interesnan di nos pais.

E ‘taskforce’ ku ta konsehá minister, su tareanan ta: pa mónitòr situashonnan di posibel riesgonan pa Kòrsou den áreanan spesífiko i tambe identifiká e posibel konsekuensianan. A base di análisisnan hasí i e  posibel menasanan i su konsekuensia, inkluso e impakto ku e situashon na Venezuela por tin, e ‘taskforce’ ta determiná i konsehá e strategia mas efektivo pa enfrentá e menasanan i mas tantu posibel mitigá e efektonan pa Kòrsou.

E ‘taskforce’ ta ser formá pa diferente ekspertonan gubernamental e.o. KPC, ‘Buitenlandse Betrekkingen’, GMN, AZ, miembronan di ‘Crisisstaf’, Kustwacht, ‘Defensie’ i otronan. E kordinadó nashonal di krísis i desaster ta enkargá ku e kordinashon di e ‘taskforce’, na nòmber di Minister di Asuntunan General. E ‘taskforce’ lo sigui mónitòr e situashonnan na Venezuela i traha huntu pa protehá interesnan di pais Kòrsou. NOTA: Texto ta scirbi den Papiamento fonetico di Corsou.