Wever-Croes: Blokea e rotonde di aeropuerto tabata inaceptabel!'Mi a rabia hopi'

ORANJESTAD – E impasse entre taxista y gobierno siman pasa, no ta conta cu aprobacion di prome minister Evelyn Wever Croes.Pero mes momento e prome mandatario ta mustra cu e no tabata di acuerdo cu e forma di actua di colega minister Arends, y cu e forma di e colega ‘porta no tabata esun miho y cu e (esta Wever-Croes) lo a actua diferente’. E siman aki den e programa Noticiacla LIVE, e mandatario a duna su reaccion riba e situacion cu a surgi un siman y mei pasa.

BLOKEA AEROPUERTO TA INACEPTABEL

 “Blokea aeropuerto ta inaceptabel” e mandatario a bisa Tito Laclé durante e programa. “Esey ta un bottomline cu bo no por yega na dje!’. “ Y mi ta hopi decepciona cu nan a haci esey y pesey mi a cay aden tambe” Wever-Croes a sigui bisa. E no tabata di hacie, pero e situacion a escala di tal forma cu e tabata necesario. Mes momento e la bisa cu pa loke ta e decision di colega minister Arends, e lo a atende cu e problema di e dos MB nan den un forma diferente. 

E SITUACION A ESCALA HOPI LIHE

Segun Wever-Croes pa loke ta e situacion a escala hopi liher, den apenas 1 ora, cu a blokea aeropuerto cu a pone cu e mester a cay aden inmediatamente. Un alternativa, tabata pa polis cu man fuerte actua contra e taxistanan, pero esaki no a resulta necesario despues. E mandatario no sa si tabatin orden pa Riot Commando actua, manera cu a keda anuncia. Por lo menos, e no tabata bou di su instruccion. Riba e pregunta cu si e prome mandatario lo a aproba intervencion di Riot Commando, e la bisa cu ‘danki Dios no a pone pa mi aproba pasobra ami echt no kier yega na e punto ey”. Ora cu a puntra si e lo a aproba si e lo a haye pa aproba, Wever-Croes a bisa cu a yega na un solucion na un otro solucion. “Mi ta spera mi no yega na e momento nunca cu mi tin cu duna autorisacion pa Riot Commando”, e la bisa, argumentando cu e la pasa den e situacion aki den oposicion den pasado unda cu e la mira cu a usa e arma aki ‘te pas en onpas’ osea corectamente y incorectamente. 

E BLOKEAMENTO DI AEROPUERTO

“E stap pa taxistanan dicidi pa blokea e rotonde di aeropuerto tabata inaceptabel. Mi a rabia hopi. Mi a haya esey un falta di respet. Mi a haye hopi mas erg cu loke nan tabata den cu e impasse” e prome mandatario a sigui bisa. “E ta un atentado contra Aruba. Dus pesey nos a cay aden” e mandatario a sigui bisa. 

ACTUA DIFERENTE CU ARENDS

E mandatario a bisa tambe cu e lo a atende e situacion (problema) cu taxistanan di un forma diferente. Entre nan, lo a informa Parlamento prome tambe y coleganan minister. “E decision a cay mane nan ta bisa na Hulandes como ‘donderslag bij heldere hemel” e mandatario a bisa. “Niun hende no tabata sa”, Wever Croes a bisa. Ora cu Laclé a puntra e mandatario si Arends a actua malo door di no informa coleganan, Wever-Croes a bisa, “E no ta mi sistema di traha. Mi sistema di traha ta cu si mi ta confrontando un situacion cu mi ta weita cu tin corupcion, lo mi a papia di dje for di hopi tempo caba!”. Esaki pasobra e kier men cu tur hende mester sa kico e ta haciendo riba e tereno ey. “Esey ta transparencia!”. Pero mes momento e ta bisa cu berdad bo no por canta bo guera adelanta pasobra ta guera canta ta guera perdi. Den caso di corupcion tin biaha bo mester ta hopi cauteloso kico bo ta bisa hopi adelanta. Pero den e caso specifico aki un rato, e informacion richting Parlamento, ta hopi importante!” e la sigui bisa. E ta mustra cu ora cu como gobernante bo tuma decision, bo tin cu informa bo Parlamento. “Esey no a tuma lugar”. “Ami lo a hacie un otro manera” Wever-Croes a bisa finalmente.