Resultadonan di HAVO y VWO na Corsou tambe ta malo

WILLEMSTAD – Mientras cu ta trata di resultado di apenas un scol, tin indicacion cu e resultadonan di e scol HAVO y VWO na Corsou, segun informacion di radio Z86 awe, ta mustra cu esaki ta basta malo, y compara cu esun di Aruba, aun mas malo. Den e caso aki, ta trata aki di e resultado di examen di prome tanda (eerste tijdvak) di KAP, (Kolegio Alejandro Paula, antes PSC) unda cu apenas 30% a slaag den prome instante. Den caso di VWO, e resultado tabata un poco mas miho, cu 45% cua slaag den prome instante. 

SITUACION HAVO VWO ARUBA

Colegio Arubano mientrastanto a bisa diabierna ultimo cu nan no ta satisfecho cu e resultadonan di examen di 2015. Asina e examen corector Anna Cameron a splica despues di e resultado preliminar di Havo 5 y VWO 6. Esey no a stroba esnan cu si a slaag (foto principal) pa goza cu champagna y grito di alegria. Cu resultado manera 43.2% pa Havo y 58.3% di alumnonan cu a gradua den nan prome intento, e pensamento aki ta logico. E ta hopi mas malo cu aña pasa, unda cu despues di e di tweede tijdvak tabatin 81% pa VWO y 70% pa HAVO. Loke tambe ta conta, ta cu aña pasa tabatin mas alumno den examen (460 vs 360 cu a traha examen e aña aki). E aña aki 244 alumno a haci examen pa HAVO y 110 pa VWO. Y for di esakinan 104 a slaag pa HAVO y pa VWO ta 63.

MOTIBONAN

E motibonan di e mal resultado ta varia segun Cameron, y e a mustra cu esaki no ta straño. “Ta cosnan cu por pasa. No ta pa motibo di e reglanan nobo introduci. Di HAVO tabatin apenas 11 alumno cu no a slaag pa motibo di e regla nobo ey. Esey ta solamente 5% di e total” Cameron a bisa. E examennan tabata mas dificil, y tambe e asina yama  'nieuwe stijl' den cual cierto vak (Scheikunde y Nederlands) a wordo duna. Ta un ‘samenhang di omstandigheden’ cu a pone cu e resultado tabata malo.

HER EXAMEN

Cameron a splica tambe cu dialuna caba lo tin e chens pa esnan cu no a slaag den e prome tanda, inscribi pa e di dos tanda, cu a cuminsa ya for di diamars y ta sigui te diabierna. Despues tin cu warda te fin di juni (26) pa wak kico e resultado final ta. Cu e resultado final, por determina kico e resultado oficial ta. Esaki por cambia tambe mirando cu aña pasa, despues di e tweede tijdvak, e resultado a mehora cu 10% (30 alumno cu a slaag e ora).