Compania local ta presenta app pa conecta pasahero cu taxi cu permiso na Aruba

ORANJESTAD  – Un siman despues cu tabatin problema cu taxistanan y gobierno na Aruba, y cu e discusion pa bin cu servicio di Uber, un compania local conoci como ‘Orounin Technologies’ a anuncia e app nobo LIT.taxi, un web app nobo cu segun e compania, ta ‘diseña pa facilmente connecta pasaheronan cu taxistanan cu vergunning na Aruba”. E compania ta sigura cu usando LIT.taxi, “turistanan y localnan por haña transportation den un manera facil y eficiente, percurando cu cada trip ta sigur, salbo, y haci door di un profesional”.

Segun e compania, LIT.taxi ta resalta manera un solucion netamente Arubano, traha specificamente pa e necesidadnan di transportacion na Aruba. “Taxistanan cu tin vergunning valido ta e uniconan cu por usa LIT.taxi, asegurando e isla su dedicacion na servicio di transporte regula, salbo y profesional. E app aki tambe ta bai promove Aruba su hospitalidad renombra, percurando cu cada pasahero tin un servicio lihe, facil y di calidad” e compania ta sigui bisa.

Segun e compania,  e ta exclusivo pa Taxistanan cu Vergunning: Solamente taxi chauffeur cu vergunning valido mag di registra, percurando cu tur trip ta duna door di profesionalnan qualifica.

E app ta ofrece peticion pa cada trip na e taxistanan mas cerca prome, y gradualmente ta ofrecenan na chauffeurnan mas leu. Esey ta asegura un servicio lihe. Noticiacla a acerca un representante di e gruponan di Taxi riba nan reaccion pa cu e app aki, pero ainda no a haya e reaccion.