Huida di presonan ta inside job?

ORANJESTAD – No ta descarta cu e huida di e dos presonan algun tempo pasa na KIA, por ta un inside job. Pero prome cu duna e punto ey mas atencion, Minister di Husticia Arthur Dowers kier warda e investigacion final. Despues por papia di posibel pasonan cu lo mester tuma. Y si resulta cu ta un inside job, esta cu e presonan a hui cu ayudo di hendenan di KIA mes, esaki lo wordo atendi cune. Ta prome biaha cu e mandatario ta trata e asunto atrobe, y esaki durante reunion di parlamento.

 E mandatario mas bien a contesta un aspecto di preocupacion cerca Partido Democracia Real, riba e presonan cu a logra huy y di con e buraco aki ta existi den e cel. E buraconan den vloer di e cel ta existi for di tempo cu KIA a wordo construi. E mandatario a bisa cu awor e lo percura pa e sistema aki wordo elimina. Den e caso aki cu a sosode, e preso a pasa via di e buraco, despues un porta cu a keda habri y djei e waya cu a wordo kita door di un trahado. Riba e sucedido, Minister Dowers a sigura cu tin un investigacion andando cu final pasonan lo wordo tuma si resulta cu tin trahador envolvi. "Prome cu esey nos no por tene ningun personal responsabel y mi no kier bay anticipa riba esaki pa satisfaccion di ningun hende," e mandatario a enfatisa.