Wever-Croes:”Ta inaceptabel cu ta cera aeropuerto pa problema cu airco!”

ORANJESTAD – “Mi tabata hopi rabia. Ta inaceptabel te na e momentonan aki ainda, cu nos mester a cera aeropuerto pa un problema di airco”. “No tin ningun hustificacion cu den this time and age, nos tin cu cera aeropuerto pasobra airco no ta traha!”. Esaki tabata e prome reaccion di prome minister Evelyn Wever- Croes riba e loke a sosode siman pasa diabierna na aeropuerto. Pa casi henter un dia, a cera aeropuerto pasobra tabatin problema cu airco, causando cu mester a desvia mas di 30 avion, y costa miles di florin na daño y perhuicio. E mandatario tabata hopi rabia riba e situacion y a manda yama e management team di Triple A NV (e compania cu ta maneha aeropuerto pa duna cuenta. Despues ta dicidi ki paso lo tuma. 

E REACCION

E mandatario ta bisa tambe cu e ta convenci cu no tabata un problema so, y ta compronde tambe cu tabatin varios problema cu a escala cierto momento, y cu a tuma e decision pa seguridad di tur pasahero. “Pero ta inaceptabel. Y e ta keda inaceptabel!” e mandatario a sigui bisa. “Mi ta compronde, te na cierto extend cu a tuma decision di cere (e aeropuerto:red), pero tur e situacion, henter e situacion ta inaceptabel. Mi ta kere cu henter Aruba ta di opinion cu esaki no mag di ripiti nunca mas”. E la tende hopi motibo di loke a pasa, y ta wardando e rapport (root cause analisis), y tambe despues tende kico ta e ‘punt van aanpak’ di e management team pa evita pa algo asina bolbe sosode. 

“Mi ta puntra mi mes cuanto di e tipo di problemanan scondi mas por tin cu mayan por bolbe causa problema. Pasobra un ta di awe, e la pasa caba e aña aki. Pero e ta inaceptabel”. Segun e mandatario si bo puntre, e ta haye inaceptabel, y a pidi minister Dangui Oduber pa inmediatamente den ministerraad reuni cu e management team di Triple A, pa asina gobierno expresa cu esaki ta inaceptabel. E reunion ey ta poni pa tuma lugar otro siman. 

NO TABATA SA DI E TUBO EYBOU

E hecho cu un di e gerentenan di aeropuerto a bisa Noticiacla cu ni e tabata sa cu e tubo cu tabatin problema, tabata existi, e mandatario no a cumpra e cuenta ey. “Bo ta suppose di sa!”. 

CABEZ TA CAY?

Ta custumber cu ora cu tin un situacion asina, mesora ta cuminsa punta dede den direccion di un hende responsabel y den forma crioyo ta bisa cu ‘un cabez mester cay’. A puntra e mandatario kico ta su pensamento riba esaki. “Dificil pa bisa, mi no no tin niun say den airport”. “Mi ta kere cu e ta hustifica tur medida mas drastico  cu tin, pasobra loke cu a pasa ta hopi drastico” e mandatario a bisa, cu por interpreta esaki como cu enberdad cabez mester cay, of por lo menos un accion asina no por keda sin un of otro medida contra un of mas hende responsabel. “Pero si esey bo tin cu interpreta cu cabez di hende mester bula, bo mester wak cada caso riba su mes. Bo por kita un hende solamente si bo por tene responsabel, y mi no sa si esey ta e caso” e mandatario a sigui bisa. 

NO TA HUSTIFICA CERA PA MOTIBO DI FAYO DI AIRCO

“No tin ningun hustificacion cu den this time and age, nos tin cu cera aeropuerto pasobra airco no ta traha!” e mandatario a sigui bisa. “Bo mester tin plan B, bo mester tin plan C, bo mester tin plan D” e mandatario a bisa. E ta compronde cu si ta na cas di un hende, mester tin un plan. E ta mustra cu p.e. na Cocoloshi (centro di gobernacion), si un lift no ta traha, ta cambia e sala di reunion pasobra tin hende cu no por cana subi trapi. Si no por traha eynan, ta traha otro caminda. “Bo ta busca bo plan B!”. Si ta METEO a cay afo, mester cera aeropuerto pasobra no por opera aeropuerto sin METEO. “Pero airco Tito??? Sorry no. Totalmente inaceptabel” e mandatario a bisa.