Gobierno ta scucha CFT pero e mes ta dicidi riba presupuesto

ORANJESTAD – Ta scucha consehonan di CFT pero Gobierno ta dicidi na final kico ta haci pa cumpli cu normanan di presupuesto. Esaki ta e mensahe cu prome minister Mike Eman a bin cune for di Corsou ayera. Na su yegada for di Corsou unda el a participa den Conferencia di Reino, Eman a papia palabra cla riba e rol di CFT na Aruba. El a lamenta cu for di cierto areanan politico ta duna un mal interpretacion na e trabou di e comision aki. CFT tin un tarea pa duna conseho na Aruba di con logra yega na e meta di un presupuesto balansa. E ta keda esey, un conseho. Na final con Aruba ta yega na su meta ta Aruba mes ta dicidi, e mandatario a expresa. Algo cu na varios ocacion, colega minister di finanza, Angel Bermudez a bisa caba.

ULTIMO RAPPORT DI CFT

Siman pasa CFT a entrega un rapport den cual ta conseha pa toch subi e BAZV cu mey porciento mas pa yega na un total di 4%. Eman a splica cu ta masha importante pa pueblo ta na altura di e rol cu CFT a bin ta hungando. “Nan tin cu supervisa e normanan den cual gobierno a acorda pa su mes wordo alcansa. Si no logra e normanan ey, CFT por duna un indicacion na gobierno di Reino y Aruba lo por haye den un situacion cu a pasa aden caba” Eman a bisa. Pues nan (CFT) ta controla e normanan cu Aruba mes ta bay poniendo su dilanti. E otro rol cu e instituto aki tin ta pa duna conseho. “Hopi biaha esaki ta wordo confundi na momento cu e consehonan aki wordo publica comosifuera cu tur e consehonan aki mester wordo aplica. CFT ta wak e presupuesto y ta bisa bo mester yega na 3.7, nan ta haci un calculacion di e entrada y gastonan, y ta duna consehonan bisando cu lo ta bon pa subi cierto tipo di impuesto of baha cierto gastonan. Nan tin pleno derecho pa haci sugerencianan.” El a splica cu ta masha importante si pa realisa cu na final di cuenta ta Gobierno ta haci e escogencia nan di maneho. E mandatario a pone hopi enfasis cu su Gobierno ta habri pa ricibi tur conseho, manera di IMF, di Fitch, Banco Central, pero gobierno ta esun cu ta haci calculacionnan “kico ta miho pa economia di Aruba, kico e economia por carga y kico e ciudadanonan por carga y kico ta haci un impacto mas faborabel pa entrada di Gobierno y na mesun momento ta haci menos impacto riba e poder di compra di nos ciudadanonan.”

MANEHO PA CU BAZV

Eman a splica tambe cu e maneho menciona di su Gobierno a haci cu na momento cu a aumenta e BAZV cu un porciento, a dicidi di reduci e prima di AZV cu un porciento (cu ta bayendo Parlamento). E ta nifica un tiki mas placa den cartera di e ciudadano. E carga di cualkier aumento di e prima di BAZV ta bira mas cargabel, pues buscando socialmente un forma mas husto. “E linea di pensamento aki ta ancra den e linea di pensamento di nos Gobierno,” Eman a bisa. CFT por haci recomendacionnan, pero finalmente loke Aruba ta wordo midi na ne ta cu Aruba a logra e normanan poni riba presupuestonan di awo te cu 2017. “Tur lo demas ta consehonan cu ta mara Aruba ta e normanan y no e consehonan. Den e sentido ey nos ta desea pa den e periodo cu ta bini pa e forma con oposicion trece e informacion por cambia un tiki ya cu tin biaha nan ta trece confusion creando insiguridad innecesario. Gobierno cada bes ta hopi cla riba e pasonan cu tin cu tuma, ta scucha tur conseho, pero conseho ta conseho y mester cumpli cu e normanan, considerando interes general di pais Aruba. Den cuadro di e aumento di BAZV, Gobierno tabatin combersacion cu SER (Sociaal Economische Raad) pa logra yega na un aumento di salario minimo. Ta spera di por ricibi mas pronto posibel un noticia positivo cu e salario minimo por wordo aumenta. “Si tur cos bay bon, gobierno ta desea pa esaki drenta na vigor na luna di augustus, pa compensa cualkier efecto di BAZV tin pa esnan cu entrada di 2500 florin of menos”, Eman a finalisa bisando.