DTP a sigura cu nan presencia diasabra na airport no tabata nada straño

ORANJESTAD - Departamento Transporte Publico (DTP) dialuna a clarifica nan presencia na aeropuerto di diasabra ultimo, cu a haya basta critica. Esaki pasobra varios taxista a cuminsa keha cu ta net durante momentonan ocupa, cu cliente, DTP a tene su inspeccion . Pero segun DTP ta bisa awor, su section di Inspectie a presenta na aeropuerto  como procedura standard di varios diasabra. E tareanan aki ta importante pa mitiga e chens cu ilegalidad y iregularidad tuma luga. 

Berdad ta cu a cera e diabierna anterior aeropuerto pa motibo di problemanan tecnico cu airco. Esaki segun DTP, “no ta kita cu DTP lo eherce su tarea di diasabra conforme schedule”, nan ta sigui bisa. Alabes a opta pa bin mas tempran pa eventualmente yuda cu logistica te unda tin mester. E intencion, fuera di e proceso di control normal, ta pa tambe recorda e diferente vergunninghouders riba nan obligacionnan conforme locual tin para den nan decreto cu a acepta na momento di acepta un vergunning. 

NO A CAY DEN BON TERA CERCA INCUMPLIDONAN

Aparentemente, segun DTP, esaki no a cay den bon tera, sigur no cerca esnan cu no tabata cumpliendo cu nan obligacionnan mara na e diferente decretonan. Alabes, segun DTP, cierto medianan cu pa otro motibonan tabata na airport a dicidi di saca un relato sin ningun rato acerca DTP su dirigentenan pa verifica si di berdad ta bou orden di gobierno a haci control. 

“ Esaki ta hopi di lamenta, mirando cu e trahadonan di DTP cu hopi entusiasmo ta eherce nan tareanan diario sin mester ser instrui door di gobierno. DTP tin su structura pa logra e meta pa cual ela keda institui y ta haci esaki cu e capacidad humano disponibel”. 

“Ta lamenta cu no ta acerca pa puntra prome cu publica relatonan cu no ta corecto. Alabes mester remarca cu no mester tin miedo di controlnan ni presencia di DTP, si abo como vergunninghouder sa cu bo documentonan ta na ordo y tambe cu bo tin disponibel eventual contratonan pa haci e tarea pa cual motibo bo ta na aeropuerto” e comunicado di DTP a sigui bisa. 

Finalisando, DTP a bisa cu kier informa cu e trahadonan tabata presente y si a mira por ehempel cu un T/O no tabata tin su nomber riba e vehiculo cual ta para den su decreto of no tin sticker di keuring etc. tabata record’e riba esaki. Igualmente taxi cu no tabata tin señal di taxi riba nan vehiculo, keuringstickers valido, etc. Claro cu esnan cu no a cumpli cu e reglanan stipula segun nan vergunning a ricibi nan rapport cu por tin consecuencia grave pa nan vergunning concerni.

Pa conclui por remarca cu tur dia DTP ta na aeropuerto pa haci su tareanan. Vooral den piekuren cu ya for di varios tempo ta bin ta haci caba. “ DTP no a haci nada cu ta stroba operacion di niun tipo di personenvervoer. Ta di compronde tambe cu si acaso observa algo cu no ta klop p.e. ta visibel cu no tin un sticker di keuring, no tin nomber di e compania ariba e vehiculo T/O, etc. DTP lo asumi su tarea pa adverti e vergunninghouder”.

Segun DTP, nan ta haya cu ta importante pa stop di bagatalisa y/of trata di mina autoridad di un departamento cu a  institui pa garantisa nos bishitantenan un transporte adecua y conforme kico nan ta exigi y paga p’e. NOTA: E potret ta uno di archivo di noticiacla di diasabra durante e 'drukte' di pasaheronan cu a keda atras un dia prome.