CFT: Adopta actitud di reserva prome cu contrae prestamo nobo

WILLEMSTAD/PHILIPSBURG – Ta imperativo pa adopta un actitud di reserva prome cu contrae prestamo nobo. E advertencia aki Colegio di supervision financiero (College financieel toezicht - CFT) ta duna den su relato anual di 2014. ‘Den e periodo cu a pasa, finansa publico di Aruba a deteriora rapidamente, mientras cu Corsou y Sint Maarten tabatin espacio pa inverti, saliendo for di un situacion relativamente sano’, segun Presidente Age Bakker den e prologo. ‘Aunke e debe di Corsou y di Sint Maarten ta tanto historicamente como internacionalmente abou, ta cuestion di keda mantene e condicion aki pa crecemento economico’.

DESAROYO ECONOMICO

Den e relato anual Colegio di supervision financiero ta duna un idea di e recuperacion vacilante di economia mundial despues di e crisis financiero y e crisis den e zona di euro. E ta mustra entre otro cu Aruba y Sint Maarten a conoce crecemento atrobe na 2014, aunke e desaroyo economico tabata basta cauteloso cu respectivamente 1 y 1½%. "Economia di Corsou a krimp pa di tres aña consecutivo, pero tin un cambio na horizonte den direccion di un crecemento levemente positivo, cu a cuminsa den e di tres cuartal di 2014". Entretanto, presion di embehecemento di e poblacion ta aumenta na tur tres pais. Reformanan structural ta necesario pa bolbe duna empuhe na economia. Menos regulacion, mas forsa di mercado y un mercado laboral mas flexibel ta para central den esaki. Pa loke ta e entidadnan publico, Colegio di Supervision Financiero ta constata cu nan ta inverti hopi den enseñansa y salud publico. Sinembargo, desaroyo economico ta keda fragil na e islanan aki. Loke si ta positivo ta cu despues di hopi aña cu fuerte subida di prijs, for di 2014 inflacion ta bou di control.

DEFICIT Y DEBE

Segun CFT, tur pais a cera aña 2014 cu un deficit riba nan presupuesto total, incluyendo e fondonan social y inversionnan di capital. Na Corsou e causa principal di esey tabata e deficit nan continuo di Banco di Seguro Social (SVB) - cu a cubri uzando placa di e fondo fluctuante - y inversionnan cuantioso, particularmente den e hospital nobo. Na Aruba tabata e gastamento di gobierno - cu a keda halto - y tambe un deposito cu a haci un solo biaha na Fondo di Pensioen. Na Sint Maarten tabata e entradanan di impuesto, cu continuamente ta keda bou di nivel, diferente proyecto di inversion y compra di e edificio nobo di gobernacion.

DEFICITNAN

Finalmente, na tur pais e deficit nan ta conduci na cuotanan di debe cu ta keda subi. E debe di Corsou a alcansa e limite considera aceptabel internacionalmente di 40% di e PNB, particularmente a consecuencia di un inversion grandi di un solo biaha den construccion di e hospital nobo; e debe di Sint Maarten ta un tiki mas abou cu esey. Pa tur dos pais ta conta cu e espacio pa prestamo nobo ta, pues, limita y cu mester mir’e den relacion cu e crecemento economico, pa mantene e proporcion di debe controlabel. Aruba a pasa na 2014 e limite di 80% y, te hasta si logra realisa e metanan conveni, na termino cortico e debe lo sigui crece, prome cu cuminsa nota un disminucion discreto na final di e decada aki. A base di esaki, no por papia mas di finansa publico sostenibel.

SUPERVISION

Den e relato anual Colegio di supervision financiero ta presenta un analisis extenso di e diferente formanan cu lo por institui supervision. Ta remarcabel cu na hopi pais un ke otro forma di supervision financiero independiente ta vigente. Si un organo di supervision kier funciona debidamente, anto ta necesario pa e tin un base di sosten amplio, loke ta nifica cu e mester keda institui a base di consenso. E organo ey mester ta berdaderamente independiente y profesional, pero no por tin ‘overlapping’ cu otro organo, manera, por ehempel, accountant. Finalmente, transparencia ta di sumo importancia pa supervision por ta exitoso. Caminda cu Colegio di supervision financiero ta distingui su mes di otro forma di supervision, ta den e echo cu no solamente e ta dirigi su mes riba asesoramento encuanto presupuesto, sino tambe riba monitoreo di ehecucion di e presupuesto. Eyden tin un plusvalia importante, en bista cu experiencia ta siña nos cu deficit y debe ta surgi particularmente pa motibo di un ehecucion di presupuesto defectuoso.