Yiunan di Corsou bou di influensia ta bolbe causa tension durante vuelo for di Hulanda

WILLEMSTAD - Durante un vuelo ku tabatin for di Amsterdam pa Kòrsou den fin siman tras di lomba, tabata reina basta tenshon bou di pasaheronan i tambe sustu. Esaki debí ku tabatin vários pelea i pleitu entre algun di nan. Ta trata di yu di Còrsounan ku lástimamente no a sa di komportá nan durante e buelo aki.

Debí na e susesonan ku a kondusí tabatin un persona ku a bira malu, dor di  e tenshon fuerte ku tabata tin riba e buelo enkuestion, kaminda asta moketa a kai.  E promé kaso tabata un hòmber yu di Kòrsou ku lo mester a dal un hòmber hulandes moketa den su kara, despues ku el a trata na pasa dilanti di e stul ku e hulandes tabata sinta.

E pasahero yu di Kòrsou a trata na bai wc, pero debí ku kaminda e kier a pasa ta unu poko mas karu pa esnan ku paga èkstra pa e asiento aki pa sinta un poko mas kómodo i sin ningun molèster.

Pero e asiento aki ta keda nèt na e pasia, kaminda e hulandes tabata sintá i ku su derecho e tabata hisa su pia pa evitá ku hendenan ta pasa djei i bai wc.

Den e kaso aki el a hisa su pia i a dal e pasahero yu di Kòrsou den su parti íntimo di kual esaki a saka moketa i dal e hòmber hulandes.

Aki a surgi un problema formal entre nan, kaminda e crew mester a kai aden pa evitá ku e problema ta eskala i sali fo’i man. Despues ku nan a logra plakia e problema aki, un otro pasahero yu di Kòrsou ku tabatin basta beter den su kurpa a kuminsá tilda un pasahero muhé ku tabata sinta banda di dje, ku e ta esun ku a hòrta su telefòn, paso e no por a haña esaki niun kaminda.

Aki a surgi un interkambio di palabra kaminda e dama a bisa e hòmber entre otro ku e tin ku bebe keda hòmber i no akusá hende riba kos ku no ta kuadra.

El a splik’e ku niun momento so e no a kue su telefòn i e tin ku buska pa wak unda el a laga esaki.

Aki tambe a surgi un diskushon di kual e hòmber a bisa ku e ta bai yama su hendenan pa bin busk’e na Kòrsou ora ku nan yega, pa asina resolvé e problema aki na bon òf na malu.  Otro pasaheronan ku ya tabata fada di e situashon a pidi pa stòp di bende alkohòl riba e vuelo ei pa evitá ku mas hende ta bebe i pone problema.

Despues ku un bia mas e crew a logra kambia e situashon i a papia ku ámbos partido, un otro pasahero ku tabata sintá patras a bin dilanti i sinta banda di e dama ku a ser tilda di a hòrta e telefòn. Dado momento e hòmber  a  haña e telefòn den e pida mei mei di e stulnan . Ora ku el a puntra di ken e telefòn ta , pareha di e hòmber doño di e telefòn a rekonosé e telefòn i a bisa ku esaki ta masha straño ku direpente e telefòn ta sali. El a sigui bisa ku e ta kere ku ta un kòmplòt e kos aki ta, pa hunga ròl ku e telefòn tabata pone ei nan i ku nan lo no a mir’e. Aki tambe a surgi un otro diskushon entre e hòmber i e muhé, kaminda menasanan fuerte a kai.

Por último un otro pasahero den e kaso aki yu di Kòrsou tambe  a tuma un kantidat di alkohòl i na final su tarheta di krédito no tabata kier a funshoná òf mas bien no tabatin sufisiente fondo. Aki a surgi un diskushon entre e ku un miembro di e crew ku a bis’e ku e tin ku paga e lokenan el bebe. Despues di a eksigié ku e tin ku paga, e pasahero a disidí di habri su telefòn i paga ku su tarheta ku ta instalá den e telefòn.

Na final ora ku e avion a baha, tantu marachausse komo polis tabata para na porta di e avion pa asina atendé i detené esnan ku lo a pone tantu turbulensia riba e avion. NOTA: Texto ta scirbi den Papiamento fonetico di Corsou.