Solucion pa grupo di hoben cu a perde nacionalidad hulandes

ORANJESTAD – E grupo di hoben (mas of menos 40) cu a keda perhudica seriamente ora cu a kita nan pasaporte hulandes for di nan algun tempo atras, dentro di poco lo wordo alivia. Un disposicion recientemente pa e minister encarga cu integracion, Benny Sevinger, ta nifica cu e grupo aki por haya nan nacionalidad hulandes bek , y cu forza retroactivo. Esaki a keda participa awe tardi pa medio di un comunicado di gabinete di gobernador di Aruba. 

E PROBLEMA

E grupo aki durante den e periodo di 1 di juni 1992 pa 1 april 2003 tabata menor di edad, y a haya e nacionalidad hulandes in corectamente, ora cu nan a wordo nacionalisa hunto cu nan mayornan e tempo ey. Ora cu a bin cay riba e problema algun tempo atras, mester a revoca nan nacionalidad hulandes (y kita e pasaporte) e ora, cu a pone cu nan diripiente no tabatin nacionalidad hulandes mas.

REGLA NOBO

E regla nobo cu a drenta na vigor, ta despues di bon cooperacion entre e departamentonan di gobierno manera DIMAS y CENSO y den cooperacion estrecho cu coleganan di Corsou y St Maarten, unda cu e problema aki tambe a desaroya e tempo ey.

INVITACION

Den proceso di ehecucion di e regla aki, CENSO a cuminsa caba cu invitacionnan individual di esnan concerni. Ta premira cu pa fin di e luna aki caba, tur esnan envolvi lo wordo atendi y yuda caba. Asina ta termina un periodo yena cu confusion e incertidumbre.

SENTENCIA

Den un reciente sentencia di corte, Hof a determina specificamente cu den dos caso specifico, y individual, un disposicion di e minister encarga dia 30 di maart ultimo, tabata determinante pa conclui cu esnan envolvi, despues, tambe a comparti e naturalizacion di nan mayornan e tempo ey. For di reportahenan reciente den prensa, basa riba e sentencia aki, por a crea e impresion como si fuera cu CENSO a actua in corectamente cu e proceso di pasaporte y no a tramita nan y cu e CENSO su personal, eroneamente no a duna nan e nacionalidad hulandes. Gabinete di gobernador a subraya cu esaki no ta un impresion corecto. “CENSO netamente a actua semper corectamente, y segun e ley aplicabel, ora di eherce su funcion. Gabinete ta satisfecho riba e ehecucion di e ley di pasaporte na CENSO, y tin tur confiansa den e seguridad y exactitud di e proceso di emision (di pasaporte)".

AUTORISA PA EMITI PASAPORTE

Mes momento gabinete di gobernador ta informa comunidad cu basa riba articulo 26, inciso 1, en conhuncion 40 inciso 1b, di e ley di pasaporte, gobernador di Aruba ta e autoridad autorisa pa emiti pasaporte hulandes na Aruba. Gobernador ta responsabel pa un proceso corecto y sigur di emision di pasaporte, conforme e reglanan stipula den e ley di pasaporte. CENSO a wordo apodera pa gobernador di Aruba pa emision di pasaporte na ciudadanonan di Aruba y ta duna esaki na nomber di gobernador. A base di e ley di pasaporte, prome cu e emision, mester tin suficiente siguridad duna riba e identidad y nacionalidad di e solicitante. Esey ta nifica cu CENSO ta obliga, den nomber di gobernador, na cada peticion di pasaporte, pa duna e siguridad aki, y controla y actua estrictamente conforme e reglanan di ley di pasaporte. Gabinete di gobernador ta traha hopi estrecho cu CENSO y tin reunion continuo y ta controla e certeza di e proceso di CENSO hopi di serca.