Por lo menos 9 buelo di Merca a keda desvia pa e.o Corsou y 4 ta ‘delayed’

ORANJESTAD – Por lo menos 9 buelo di Merca a keda desvia pa otro destinacion manera Corsou diabierna, pa motibo cu a cera aeropuerto di Aruba debi na problema di airco. Ademas, tin 4 buelo cu ta ‘delayed’, wardando na nan destinacion kico pa haci, y tin uno cu a dicidi di cancela. Esaki ta buelonan di Merca so. Na tur, tin por lo menos 30 buelo afecta durante e ora cu aeropuerto a cera su porta. Buelo di KLM for di Hulanda, a anuncia cu e ta yega 3 ora mas laat, esta 9’or, y e ora ey si tur cos ta bon, aeropuerto mester a habri caba.JetBlue tabata e aereoliña mas afecta cu por lo menos 5 buelo desvia, sigui pa American cu tabatin 2 buelo desvia y 2 delayed, Tur buelo di United a keda desvia, y uno di Delta. Tambe un buelo di COPA, (no Mericano) tambe a keda desvia. 

COSTO

E costo di tur e buelonan desvia y of retrasa, ta causa un peso financiero enorme riba e aeroliñanan, mirando cu no ta solamente esnan cu ta yega laat, sino esnan cu tin cu bay cu e avion, ta haya nan mes den ‘problema’. Mayoria di nan ta buelonan cu tin coneccion cu ta wordo perdi. Esaki ta traduci na extra gasto di hospedahe pa e turistanan, cu ta inclui cuminda y transporte. Turistanan cu no por biaha awe, ta haya nan ta keda un dia extra, mientras cu esnan cu ta yega Aruba, ta haya nan mes ta keda na un otro destinacion, pa varios ora y despues ta yega Aruba, of ta pasa anochi na e destinacion ‘no planea’. Tur esaki ta costa placa, cu un hende tin cu paga p’e.