UPDATE: Aeropuerto di Aruba ta keda cera te awe nochi tempran

ORANJESTAD – Aeropuerto di Aruba ta keda cera te cu awe nochi 7’or y mei di anochi. Asina e aeropuerto a informa diabierna merdia como actualisacion di e situacion cu a surgi tempran debi na e problema cu airco. Mientrastanto e motibo di problema a bira conoci. 

RUPTURA DEN PIPA 

Durante ora di anochi, a sosode un ruptura den e “primary chiller pipe” ubica den un buraco bow tera. Pa localisa e sitio di e parti kibra y haci e buraco bashi a tuma basta tempo. “ Actualmente, nos ta den e proceso di desmantela un “valve” pa yega na e area daña y reemplas’e. Nos ta en espera pa haya e materialnan necesario pa por continua cu e reparacionnan. E periodo di tempo calcula pa completa e reparacion aki ta mas o menos 5 pa 7 ora” aeropuerto a informa.

EXTENDE CIERTE DI AEROPUERTO 

Como tal a extende e ceramento di Aeropuerto cu 6 ora adicional, te cu 7:30 PM debi na e problema tecnico cu esistema di airco. “Nos ta trahando duro pa resolve e problema mas lihe posibel y lo duna mas informacion asina cu esaki ta disponibel” e comunicado a sigui bisa.