Reunion di Reino a termina sin acuerdo riba geschillenregeling

WILLEMSTAD – E asunto di geschillenregeling a pega e reunion di Reino ayera formalmente na Corsou. Di e forma cu partidonan a firma un slotverklaring te 10’or di anochi, lagando e asunto ey afo. Asina Antiliaans Dagblad ta raporta awe mainta. A palabra cu lo continua cu e discusion durante proximo reunionnan di IPKO y pa mas tarda aki un aña bin cu un proposicion.

PALABRA BUNITA

“Tur politico tabatin palabra bunita pero de hecho no tin un acuerdo ainda”. Entre nan e declaracion di prome minister di Aruba Mike Eman cu a bisa “De grootste kloof zorgt voor de mooiste brug”, y a sigui bisa cu ayera nan a ‘overbrug’ e kloof.

REUNION LARGO

Durante curso di dia tabatin un sin fin di reunion, priva, un bay bin di e delegadonan y a nota cu e tres islanan Aruba, Corsou y St Maarten a ‘team up’ y Hulanda tabata su so. E problema cu tin tabata cu Hulanda no por a bay di acuerdo cu e proposicion di e tres islanan riba e ‘geschillenregeling’. Y envez di un conferencia di prensa pa atardi 6’or, esaki a keda tarda debi na e reunionnan ‘bay bin’ y finalmente pa 10’or di anochi, a sera e acuerdo riba otro punto, lagando esun di geschillenregeling afo.

GESCHILLENREGELING

E problema di geschillenregeling ta e forma huridico den cual mester duna esaki un contenido. Den e ultimo reunion di IPKO cu ta nivel parlamentario, parse cu partidonan a haya otro, pero den e caso aki, riba nivel di gobierno, cos a pega atrobe. Lo mester warda por lo menos un aña mas pues, pa e asunto keda regla. Un geschillenregeling ta manera un corte cu ta determina diferencianan di opinion entre paisnan. Algo cu e islanan menciona ta sinti cu tin necesidad pe, mirando e ultimo desaroyonan cu a tuma lugar. Hulanda (riba nivel di gobierno) tin un pensamento diferente.