Minister Arends no ta haya necesario pa revoca e dos MB riba maneho di taxista

ORANJESTAD – Minister di transporte Ursell Arends diaranson mainta a confirma na Noticiacla cu no tin motibo pa revoca e dos decretonan ministerial, y e motibo ta cu durante reunion cu e taxistanan, nan no por a substancia e motibo pakico mester revoca esaki. Ademas, e minister ta pensa cu e MB ta drenta na vigor te fin di augustus, pues tin tempo pa atende cu esaki. 

OTRO TEMA

Segun e mandatario, tin espacio (contestando otro pregunta di noticiacla) suficiente pa cambio pa taxista, cu no ta encera e MB manera e ta publica aworaki. E reunion a produci varios otro problema cu mester haya atencion y cu lo haya atencion riba e di dos reunion dia 16 di augustus proximo. 

NO A INFORMA COLEGANAN MINISTER

E minister a admiti cu e no a informa e coleganan minister anteriormente di e cambionnan presenta, y cu ta durante e reunion di conseho di minister extraordinario e la informa su coleganan. Berdad cu tin varios minister cu tabata simpatisa e taxistanan, pero ora cu Arends a presenta su caso, e la mustra cu ‘prueba den man’ pakico e la opta pa e cambio menciona, usando e stapel di documento cu e tin na su disposicion y cu esaki ta hustifica su decision. Pues por compronde cu despues di e reunion, cu e ministernan colega, lo a compronde y por sostene su decision. 

NO TA GENERALISA

E mandatario a sigura cu no ta generalisando cu tur 465 taxista ta usando e sistema coruptivo cu e kier cambia, y ta papiando di ‘aworaki’ cu tin un grupo di entre 10 pa 15 taxista cu lo ta usando e sistema aki y cu ta wordo investiga.