Deportacion pa trahadonan gara na RIU y multa pa compania

ORANJESTAD – E trahadonan di e companianan di construccion na pia di trabou pa RIU Palace ayera, tin chens di wordo deporta. Manera cu NoticiaCla.com a trece ayera, un cantidad di trahado (e resultado final ta 31) a keda deteni ora cu Guarda Nos Costa, hunto cu dept di Labor a actua y tene un razzia na e hotel cu ta wordo ‘remodela’. Un dia despues, ta parse cos no ta caba aki y cu tin consecuencia tanto pa e trahadonan y e compania cu a emplea nan.

SITUACION

Informacion cu NoticiaCla.com a ricibi ta indica cu ta trata di trahadonan reparti den tres compania di construccion. Lo bay laga yama nan y cuminsa cu e proceso pa deporta esnan cu a resulta enberdad di ta indocumenta. Pero no ta keda eynan, sino lo pa multa e companianan  responsabel pa emplea e trahadonan aki. Ta trata di multanan administrativo.

SOSTEN DI SINDICATO

Presidente di sindicato FTA Hubert Dirksz a apoya e accion di Warda nos Costa di ayera mainta ora cu a tene un razzia na hotel RIU Palace. Na tal occasion a bay cu no menos cu 31 hende trahado den construccion. E hotel ta sera pa remodelacion, y tin solamente trahadonan di construccion aworaki. Un grupo grandi di nan no por a presenta nan documentonan. Segun Dirksz a splica NoticiaCla.com,  e ta mustra cu e lucha di e trahado tabata husto, y ta merece un proteccion di un sindicato. Ademas e ta un señal contra un multinacional (RIU) cu ta exploita e trahadonan. Algo cu Dirksz a condena.

SOSTEN DI GOBIERNO

Segun e lider sindical, e mester tin un sosten fuerte di parti di gobierno pa loke cu departamento di labor ta haciendo, esta combati exploitacion di trahado. “Aruba mester por drenta un miho momento unda cu ilegalidad por wordo combati”. Ora cu a puntra si ta FTA ta esun cu a haci e denuncia, Dirksz a confirma esaki. “E trahadonan a haci denuncia y nos tambe a haci denuncia” e lider sindical a bisa. “E rumornan di ilegalidad ta coriendo di basta dia. Pero nos no tabatin confirmacion di esey” Dirksz a bisa. Pero cu e razzia, e confirmacion a bin, pa cual un cantidad grandi di trahado a wordo gara. No ta conoci cuanto trahado na final a keda deteni.

RAZZIA

Tabata awe mainta ora cu Warda Nos Costa a bin di forma di sorpresa y cuminsa haci control. Dado momento un cantidad di persona a core bay direccion pa laman den nan spanto, keriendo cu nan lo por a huy. Esey sinembargo no a duna resultado pasobra hasta nan a wordo gara pa personal di Warda Costa.