Tin chens cu Barbados por sigui toch pa proximo buelta

BRIDGETOWN - Barbados lo por scapa un multa toch y evita descualificacion for di e ronda di cualificacion di FIFA Copa Mundial. E motibo ta cu a resulta cu e comisionado di e wega, a aproba e hungado en cuestion, Hadan Holligan como uno cualifica pa hunga. Esaki ta trece e twist atrobe den un storia cu por a duna Aruba toch un chens chikito di ‘keda na bida’.

UN HUNGADOR INELIGIBEL SO

Ta resulta cu no obstante e hecho cu Holligan tabatin dos carchi heel den dos wega consecutivo, un fuente serca di e ekipo nacional, a bisa cu e nomber di Holligan tabata entre 23 nan presenta pa un chekeo di pasaporte, un anochi prome cu e wega, na e hotel di e ekipo. “Ora cu a caba cu e chekeo, un dia prome cu e partido, e ‘match commissioner’ a indica cu solamente Akeene Browne, cu a haya un carchi cora den e prome wega contra Aruba, no tabata eligibel pa hunga, ya cu e mester a haya un suspencion di un wega” e fuente a declara na Midweek Sport awe. No tabatin ningun mencion di Holligan kedando afo, segun e fuente. Segun e website di CONCACAF, unda cu e ekiponan di e weganan clasificatorio ta menciona, Holligan a haya dos carchi heel, y mester a wordo automaticamente wordo para di hunga den e proximo wega.

PROTESTA DI ARUBA

Segun regla di FIFA, Aruba lo mester a protesta den e prome 6 oranan despues di e wega, y sigui cu un protesta por escrito na e instancia deportivo, dentro di 24 ora. No ta conoci si esaki a sosode door di autoridadnan di Aruba. Y si esaki no a tuma lugar, e ora no por haci nada mas y Barbados ta pasa pa e siguiente buelta.

NOTICIA DI DESCUALIFICACION

Ayera NoticiaCla.com a raporta como prome medio, cu tabatin chens cu e ekipo di futbol di Barbados cu a gana Aruba diadomingo, por a keda descualifica y elimina di e torneo di cualificacion di FIFA. Asina e corant di Barbados, ‘NationNews” a raporta ayera mainta. Ademas, fuera di descualificacion, e por a wordo seriamente multa pa a laga un un hungador ‘illegal’ hunga den e partido di diadomingo ultimo. No tabata conoci si dado caso descualifica Barbados, cu Aruba tin un chens atrobe. 

HUNGADOR ILLEGAL

Barbados a gana e partido diadomingo 1-0, despues di nan victoria di 2-0 na Aruba. Como tal nan a avansa pa e di tres ronda. Sinembargo, tur esaki ta parse envano segun investigacion haci pa NationSport. Ta parse cu e medio campo Hadan Holligan cu a score e unico goal, mester a wordo exclui di hunga, pasobra e lo a haya dos carchi heel. Segun informacion di wega, Holligan a haya su prome carchi den di prome ronda contra US Virgin Islands, y a haya su di dos durante e prome wega entre Aruba y Barbados.

CARCHI HEEL

A compronde cu secretariado di Barbados Football Association (BFA) a wordo informa oficialmente di e inhabilidad, pero e informacion no a wordo pasa pa e gerencia y parti tecnico di e ekipo. Mientras cu e lo mester tabata informacion comun dentro di e ekipo cu Holligan tabatin dos carchi heel, e manager Adrian Donovan no a biaha cu e ekipo pa Aruba. NOTA. E foto ta na final di e partido diaranson siman pasa na Aruba entre e ekipo di Aruba y Barbados. E coach Giovanny Franken papiando cu su team despues di e wega.