• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Atletanan di Aruba a termina nan participacion na Olimpiada sin medaya, pero bon prestacion si

PARIS – Tur 6 atleta di Aruba na Olimpiada di Paris a termina nan participacion, sin medaya, pero si cu un experiencia y mehoracion grandi personal di nan tempo. 

JUST VAN AANHOLT 

E ultimo pa participa, tabata Just van Aanholt riba boto. Despues di 8 race, Just a posiciona na di 26, (39), 25, 24, 34, 10, 23, 36 lugar den cada ‘race’ respectivamente. Cu esaki Just a keda na di 33 lugar overal y no ta logra clasifica pa e medal series race   

Cu Just completando su participacion aki na Weganan Olimpico Paris 2024 ta conclui participacion di Aruba tambe den e Weganan Olimpico aki. Just van Aanholt a logra su clasificacion pa Paris 2024 na e Weganan Panamericano Santiago 2023 y a bin ta traha hopi duro den e ultimo luna nan aki na Marseille, Francia.

CHLOË FARRO  

Atleta femenino di natacion, Chloë Farro a completa   su evento di 50m liber. Drentando awe den e heat number 7 di 10, lane number 8. Chloë ta pone un tempo di 26.49 seconde kedando asina na di 7 lugar den su heat. Overal Chloë ta finalisa na di 32 lugar di 79 atleta. 

Chloë ta conclui su participacion aki na Weganan Olimpico Paris 2024. Su prome weganan Olimpico y cu el a sa di representa nos bandera durante e Ceremonia di Apertura pa cual hunto cu Mikel Schreuders tabata e abanderado nan durante e recorido den e riu ‘Seine’. 

ETHAN WESTERA  

Na Marseille, Francia a duna inicio na e Medal Series den Men’s Windsurfing. Despues cu Ethan a logra posiciona su mes entre e 10 mihornan diaranson ultimo kedando na di 9 lugar. 

Ethan a sali fuerte y durante di e careda tabata bataya entre e prome puesto nan y despues di tres buelta tabata posiciona na 3er lugar. Na final a conclui e careda na di 4o lugar. 

Cu e 4o lugar den e cuarto di final Ethan ta keda corto pa pasa pa e semi-final. Pero ta bira e prome atleta di Aruba pa logra e Diploma Olimpico. 

Diploma Olimpico ta wordo duna na atleta nan cu ta entre e 8 mihornan di nan disciplina. Un logro grandi esaki ta bira pa nos isla Aruba cu un atleta di nos Isla ta logra obtene un diploma olimpico. 

SHANAYAH HOWELL  

E atleta di BMX, Shanayah Howell  tabatin programa pa duna inicio na su competencia. Shanayah tabatin tres moto inicialmente y si finalisa den top 20 tin e oportunidad den un careda mas pa clasifica pa semifinal. 

Den e prome moto, Shanayah ta logra un bon salida pero despues di e prome birada no ta bula e sero por completo y ta cay atras den su moto kedando na di 8 puesto. Den e segundo moto ta logra un bon salida pero ta cay atras y finalisa na di 7 lugar. Den di tercer y ultimo moto no ta logra un bon bula entre e prome sero nan pa cual no a logra keda hunto cu e grupo y ta termina na di 8 lugar. Kedando asina na di 23 lugar overal.

Shanayah ta conclui su participacion na Weganan Olimpico Paris 2024 den su propio palabra satisfecho. E tabla final a demostra con dificil e careda nan tabata, mirando cu campeon mundial 2022, Felicia Stancil a keda afo di e clasificacion y Mariano Pajon a logra pasa pa e ronda di ultimo chens y finalmente pasa pa semi-final cu ta tuma lugar mañan. 

MIKEL SCHREUDERS

E atleta di natacion, Mikel Schreuders a landa su di dos evento cual ta e 50m liber. Iniciando den e heat number 6, lane number 6, Mikel a logra pone un tempo di 22.14 seconde y kedando na di 3er lugar den su heat. 

Un total di 10 heat a tuma lugar den e evento di 50m liber y na final di esaki e resultado final a pone Mikel Schreuders na di 26 di 74 lugar overal. E mihor 16 nan a clasifica pa e ronda di semifinal cu ta tuma lugar awenochi na La Defense Arena.

Cu esaki Mikel ta finalisa su participacion na e Weganan Olimpico Paris 2024. Concluyendo asina su di tres participacion na un Olimpiada y bon pa remarca e ta e prome atleta di Aruba pa logra clasifica cu tempo A. 

PHILIP ELHAGE 

Philip Elhage tabata e prome di e 6 atletanan cu a wak accion pa Aruba na e Weganan Olimpico. Despues di e apertura siman pasa diabierna,  di biaha Aruba a inicia cu su participacion den e Weganan y e prome atleta pa mira accion diasabra mainta siman pasa, tabata Philip Elhage den e deporte di tiro, 10m air pistol.  

E deporte di tiro ta tuma lugar na Chateauroux, Francia un ciudad cu ta situa na 3 ora leeuw di Paris. E prome ronda di 10 tiro Philip no ta logra su mihor puntuacion cu a hasi dificil su siguiente 50 tiro. Den e deporte di tiro, e atleta tin 60 tiro pa completa den 1 ora y 15 minuut cual ta pone un presion na momento cu cay atras. 

Den e siguiente ronda nan por a mira un Philip mucho mas trankil y logrando un total di 7x 10 punto. En total Philip ta finalisa su competencia cu 554 punto y keda na di 33 lugar. E mihor 8 nan ta esnan cu ta clasifica pa e ronda final cu ta tuma lugar diadomingo mainta. NOTA: Informacion y potret di COA.