Programa cu tips pa yuda bo relacion cu bo cacho, ‘Papia mi di Cacho!’ ta cuminsa e siman aki

ORANJESTAD – E siman aki, diaranson pa ta exacto, ta inicia un programa nobo dedica na doñonan di cacho, yena cu hopi tips, titula ‘Papia mi di Cacho!’. E ta presenta pa e conocido entrenador di cacho Tito Laclé, cu den e serie di programa aki lo duna conseho, demonstracion util riba e tema di cacho. E intencion ta pa di e forma aki, yuda doñonan di cacho domina nan cachonan miho, y prepara futuro doño di cacho ora cu nan dicidi di (atrobe) busca un cacho nobo. E duracion di programa ta varia entre 10 pa 15 minuut, esta no mucho largo, pero ta yena si di informacion balioso cu ta hopi util pa tur doño di cacho. 

E PROGRAMA

E programa lo ta visibel via e canal di youtube 'Papia mi di Cacho', y lo ta disponibel entrante diaranson awor. Pa mira esaki, por bay riba e pagina di Facebook di The Dog Specialist, cu e mesun titulo, y tambe riba youtube, y type e palabra 'Papia mi di Cacho'. E ora bo por subscribi y keda pendiente pa cada siguiente programa cu aparece riba e canal. E intencion ta pa un biaha pa siman, bin cu programanan nobo yena cu tips, manera kico pa wak y sa prome bo busca bo prome cacho, con pa no humanisa bo cacho y su consecuencia, y tambe con pa anda cu e energia di un cacho. 

LACLÉ

Laclé ta un entrenador y comportacionista (dog behaviorist) di cacho, pa mas di 12 aña. Su expertisio tabata di duna entrenamiento di disciplina basico pa cacho. Despues cu fin di aña pasa e la haya entrenamento di e entrenador internacional renombra Cesar Millan riba e tereno aki, e la amplia su expertisio, a re-brand sum es y awor ta conoci como The Dog Specialist y awor ta atende cu tur tipo di situacion di cacho. E ta duna entrenamento basico, leash training y tambe yuda cu cachonan problematico. Riba e portal www.thedogspecialist.org por haya tur sorto di informacion di su forma di entrena, comentarionan di clientenan cu a comparti nan experiencia, y tambe tin e posibilidad di reserva cita pa un consulta.