E prome grupo di studiante a yega Hulanda dialuna merdia y keda ricibi pa personal di Arubahuis

ORANJESTAD – E prome di dos grupo di studiante di Aruba a yega Hulanda dialuna mainta (ora di Aruba), pa sigui cu nan estudionan avansa. Ta trata di e grupo di 58 studiante cu ta bay biba na Amsterdam, Arnhem, Den Bosch, Dronten, Enschede, Maastricht, Sittard, Nijmegen, Rotterdam, Tilburg, Utrecht, Wageningen y Zwolle. E aña aki un total di 207 studiante di 247 cu a haya fiansa pa studia, a opta pa bay Hulanda, di cual 118 a haci uso di Arubalening.    

DI DOS GRUPO TA SALI DIALUNA 

E di dos grupo di studiantenan ta bay biba na Breda, Delft, Den Haag, Eindhoven, Gouda, Groningen, Leeuwarden y Leiden ta sali rumbo pa Hulanda awe dialuna 5 di augustus 2024 pa 7.15 di anochi riba vuelo KL 765 di KLM. En total tin 60 studiante riba e vuelo aki.

PREPARACION 

Ta despues di varios luna di anticipacion y preparacion e momento grandi a yega pa studiantenan tuma e gran paso di sigui cu nan estudio. Algun di nan aki den region mes manera na Curaҫao, Canada, Puerto Rico of Merca, mientras algun ta scoge pa sigui aki na Universidad di Aruba of IPA. E gran mayoria sinembargo ta keda scoge pa bay Madre Patria Hulanda. En total Minister di Enseñansa y Deporte hunto cu Minister di Finanzas y Cultura a otorga 247 fiansa pa sigui cu un estudio den exterior. E cantidad di studiante cu ta sigui cu nan estudio den exterior ta reparti di e siguiente forma.  

OTRO STUDIANTENAN

Pa locual ta trata e otro paisnan Seccion di Studiefaciliteiten ta informa cu tin 19 studiante cu ta bay sigui nan estudio na Estados Unidos, 7 na Canada, 5 na Curaҫao, 4 na Spanje y 1 na Puerto Rico.

STUDIANDO NA ARUBA 

Pa Aruba tin en total 65 fiansa otorga pa Minister di Enseñansa y Deporte hunto cu Minister di Finanzas y Cultura na studiantenan cu ta sigui nan estudio na Universidad di Aruba, IPA of EPI Banda di esaki tin e studiantenan cu ta bayendo sigui nan estudio na Hulanda sin Arubalening, e asina yama Freemovers. Seccion di Studiefaciliteiten no tin un bista di cuanto studiante exacto ta trata akinan, pero di e grupo aki 25 freemovers a aserca Cas di Aruba pa participa den e opvangweek y 5 freemovers ta bayendo riba e vuelo