• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Parlamentario di St Maarten Arrindell den libertad atrobe despues di interogacion

O’STAD/PHILIPSBURG.- Despues di su interogashon outoridatnan hudisial den fin di siman tras di lomba a laga parlamentario pa United People’s (UP) party, Akeem Arrindell den libertat atrobe. Asina partido UP ta anunsiá indikando ku e parlamentario ta bèk den seno familiar i huntu ku su amigunan.

A detené Arrindell djaweps siman pasá den e investigashon “Aconitum” riba aktonan ilegal di pago pa risibí voto durante elekshon di 11 yanüari 2024. Arrindell ta alabes kandidato number 3 riba lista di partido UP pa elekshon dia 19 ougùstùs awor.

UP ta konsiderá e echo ku a laga Arrindell den libertat atrobe komo un viktoria den e lucha kontinuo pa hustisia i rèspèt di siudadanonan i polítikonan eligí. E detenshon di Arrindell ta lanta interogatorio serio serka e partido riba motivashonnan di Ministerio Públiko.

E momento ku a skohe ta sugirí un posibel intento pa influensiá resultado di elekshon na lugá di intentonan sinsero pa logra hustisia, e partido ta bisa. “UP ta para firme tras di Arrindell i tur otro ku a persiguí inhustamente i ta boga pa hustisia, un proseso hustu i kumplimentu ku lei.”

Personal di Landsrecherche di St. Maarten a detené riba djárason 31 di yüli 3 otro persona den e mesun investigashon aki.  E personanan detené ta sospechá entre otro di a partisipá den un organisashon kriminal ku e meta pa kumpra voto, for di kua miembro di parlamento Arrindell lo tabata esun prinsipal ku a benefisiá di e aktonan aki.

Tambe e personal di Landsrecherche bou di direkshon di fiskal di Ministerio Públiko i den presensia di un hues komisario, a listra Arrindell su ofisina den edifisio di parlamento. Arrindell ta e di dos polítiko aktivo ku Ministerio Públiko ta investigá aktualmente.

12 yüli personal di RST huntu ku wes komisario a tene entrada hudisial tantu na kas komo na ofisina den edifisio di parlamento, di otro parlamentario, esta Kevin Maingrette. E entradanan hudisial ta den kuadro di investigashon “Metz” den kua ta sospechá Maingrette di soborno i di a abusá di su posishon.

Esaki relashoná ku lokual a tuma lugá ku a kousa ku gobièrnu di URSM, DP, NOW i PFP a kai. Tabata Maingrette ku a kita su sosten for di e koalishon pa djòin un mayoria nobo den parlamento huntu ku partidonan National Alliance i UP pa despues e bini bèk riba su desishon i pidi despensa.

Pero promé minister demishonario, Luc Mercelina a disidí kaba pa pidi gobernadó disolvé parlamento i yama elekshon nobo ku ta tuma lugá 19 ougùstùs awor. Den e sekuensia di susesonan aki Ministerio Públiko di St. Maarten ta informá ku tin sierto sospechonan ku mester investigá profundamente pa asina haña aklarashon si tin aktonan kriminal ku a tuma lugá.

UP ta konvensí ku a base di investigashon lo eksonerá Arrindell di tur sospecho i ta mustra enfátikamente riba e preokupashonnan ku ta biba riba e proseso demokrátiko na St. Maarten. “Lo reeligí Arrindell durante elekshon 19 ougùstùs awor i e lo sigui dediká su mes na sirbi interes di e pueblo di St. Maarten”, e partido ta bisa.

Segun UP ta pa añanan largu kaba ta akusá Ministerio Públiko di ta abusá di su poder pa influensiá resultado di elekshon. NOTA: Texto ta scirbi den Papiamento fonetico di Corsou.