Minister ta gana un caso y perde otro den asunto de Ruijter/Solo

ORANJESTAD – Minister Otmar Oduber a gana y perde un caso awe den Corte. Mientras cu di un banda e tabata anuncia su victoria contra e caso di Jan de Ruijter, e otro sentencia tabata contra dje esta di Edmond Croes. Oduber a opta awe mainta pa solamente atende esun di victoria, pero no a bisa nada di esun cu e la perde. Segun Oduber, esaki ta pasobra ta trata di e mesun caso, esta cu e la demanda tur dos, y huez no por pone tur dos rectifica den mesun corant.

SENTENCIA

Den un sentencia, enberdad segun Oduber , huez a pone den forma extenso, -cual no ta sosode usualmente-, tur lo cual Sr. de Ruijter mester rectifica. Esaki ta cu el a actua den un forma ilegitimo dor di a lanta e impresion robez cu e tin prueba di e validez di e acusacionnan presenta den e articulo contra Oduber y tambe dor di a mara e acusacionnan aki na e conclusion cu Oduber ta corupto. E mester finaliza su rectificacion bisando cu e no tin ningun prueba di e validez di e acusacionnan y cu e no por a saca dicho conclusion. Huez a pone tambe un dwangsom di mil Florin pa cada dia cu Sr. de Ruijter no cumpli cu sentencia di huez te na un maximo di 50 mil Florin y tambe mester paga pa e gastonan di Hof y tambe gastonan di Minister Oduber pa loke ta e kort geding.

RECHASO

Sin embargo, den e otro sentencia, huez ta rechasa e ponencia di Oduber y ta asina ‘wijs af’ e peticion. E ta condena Oduber pa paga e gastonan den e prome instancia, y den recurso di casacion principal, na banda di Solo y presupuesto como nihil. Esaki ta e parti unda cu Oduber ta demanda Solo tambe. Según interpretacion di Oduber, como cu huez a dicta caba contra de Ruijter, e no ta haya necesario pa un biaha mas sentencia e corant.

EDMOND CROES

Sinembargo, propietario di Solo di Pueblo, ta cuestiona e punto aki riba su pagina Facebook y ta interpreta e declaracion di Oduber como ‘ treciendo confusion, unda cu supuestamente el a gana Edmond Croes/ Top FM. Pues e asunto ta keda uno di interpretacion entre nan dos. Aunke cu e hecho ta keda si cu Oduber a gana su caso contra de Ruijter.