Merca ta mira candidato di oposicion como ganado di eleccion di Venezuela

WASHINGTON - Merca ta convenci cu no tabata presidente Maduro cu a gana e eleccionnan na Venezuela, sino e candidato di oposicion González. “E resultadonan oficial no ta representa e boluntad di e pueblo Venezolano,” Secretario di Estado Blinken a bisa den un deklaracion.

Blinken ta bisa cu e Conseho Nashonal Elektoral no tin “ningun credibilidad di nada” debi na iregularidadnan di votacion y e falta di resultado pa centro di votacion. E ta duna mas importancia na e cifranan cu oposicion a recauda pa medio di exit poll y observadornan durante e conteo di voto.

Segun e resultadonan oficial, presidente Maduro a gana e eleccion cu 51 pa 44 porciento di e votonan. Sinembargo, oposicion ta bisa cu su propio conteonan a mustra cu e rival di Maduro, González, tabatin mas o menos 70 porciento di votadornan su tras. A base di e resultadonan preliminar ei, Blinken ta bisa cu Maduro “nunca por alcansa.”

Mesora despues cu Maduro a wordo declara ganador door di e conseho electoral, presion a crece pa publica e resultadonan completo pa cada urna electoral. Segun Maduro, e hecho cu esaki no a sosode te awor ta debi na atakenan cibernetico. E no a duna ningun detaye ni prueba y oposicion ta yama e excuus ridiculo.

“Nos tabata sa cu gobierno lo a gaña. Nos tabata sa pa añanan ki tipo di weganan e ta hungando,” lider di oposishon Maria Corina Machado a contesta den un op-ed den Wall Street Journal. “Niun hende no a pensa cu Maduro lo a consede derota.”

Den e artíkulo, Machado ta bisa cu el a bai sconde pa su mes seguridad, meskos cu su empleadonan. “Mi tin miedo pa mi bida, pa mi libertad.” Candidato González tampoco no a wordo mira den publico desde e eleccionnan di diadomingo.