Corte: Natura Development NV por pidi permiso pa beach pero no na e zona Marino

ORANJESTAD - Dia 31 di juli 2024, Corte Comun di Husticia a dicta sentencia den e caso di apelacion di Natura Development N.V. (Embassy Suites) y Minister di Asuntonan General contra Fundacion Aruba Birdlife Conservation. E caso tabata draai rond di e legalidad di un permit di construccion pa expanshon di beach na Eagle Beach, ku a wordo otorga na Natura door di e minister y a wordo desafia door di e fundacion. Gobierno di Aruba mientrastanto a saca nan propio comunicadonan, uno na nomber di gobierno y otro na nomber di minister di medio ambiente. 

ANTECEDENTE Y CUADRO HURIDICO

Natura Development N.V., un desaroyador di biennan rais, a haña un permit di construccion cerca e Minister di Asuntonan General pa hisa i nivela e lechi (di laman) pa expancion di beach. ABC tabatin miedo cu e trabou aki lo a afecta e balornan ecologico di e area, specialmente e yerba di laman y selvanan di mangel proteha. Riba 15 di november 2023, Corte di Prome Instancia a declara e apelacion di e fundacion bon funda y a anula e permit di construccion. Natura Development N.V. y Minister di Algemene Zaken a apela contra e decision aki.

CONSIDERACCIONNAN HURIDICO CLAVE DI CORTE

ROPV y Funcionnan: Corte a confirma cu e tereno pa cual a otorga e permiso di construccion tabata parcialmente designa como “Beach” y parcialmente como “Marine Zones”. Di acuerdo cu e Plan di Desaroyo Espacio cu Reglamentu (ROPV), e destinacionnan aki ta destina specíficamente pa diferente funcion: E destinacion di “Zona Marino” ta dirigi riba conservacion, restauracion, desaroyo y maneho di balornan natural i ecologico. Corte a dicta cu construccion di beach no ta cuadra den e funcionnan aki, pasobra ta trata di un destinacion di awa y construccion di beach lo cambia e terenonan di awa den terenonan di santo pa uso recreativo. E designacion “Beach”, di otro banda, ta permitií construcion di beach, basta cu e paisahe existente, balornan natural y ecologico no wordo perhudica.

PERMIT PA ‘KIBRA OLA’

Corte a determina cu e construccion di e asina yama 'kibra ola' (golfbrekers) no a wordo pidi explicitamente pa Natura y p’esei no tabata permiti. Ademas, Corte a dicta cu un ‘kibra ola’ ta un structura y cu construccion di structuranan denter di e designacionnan “Beach” i “Marine Zones” no ta permití sin un exoneracion.

BALORNAN ECOLOGICO Y CONDICION DI PERMISO

Corte tabata di opinion cu, basta cu e condicionnan declara ta cumpli, e permit di construccion di beach no ta perhudica e balornan ecologico  di e tereno zona “beach”. Sinembargo, un permit di naturalesa tambe ta necesario pa realisa un beach riba e terenonan aki.

CONCLUCION Y ACCIONNAN DEN FUTURO

Corte diaranson a anula e sentencia di Corte den Prome Instancia parcialmente , esta te na e grado cu e permiso tabata relaciona cu tereno zona “Beach”. Sinembargo, e sentencia a confirma cu e permit pa e tereno zona “Zona Marino” a wordo revoca y rechasa. No ta permiti construccion di beach pa e destinacion “Zona Marino”.

PERMISO NOBO

Debi cu awor e permiso original a caduca pa motibo di no a termina e trabaonan na tempo, Natura mester haci un peticion pa un permiso nobo. Ora di evalua e peticion nobo aki, e minister lo mester tene cuenta cu e sentencia di Corte. Pa e sentencia, click AKI